Справа супраць блогера і актывіста Аляксандра Кабанава раскідалася

Яго спрабавалі абвінаваціць у «прысваенні» 10 рублёў.

Пра гэта блогер і актывіст Аляксандр Кабанаў распавёў у сваім «Фэйсбуку».

«Крымінальная справа супраць мяне спыненая. За адсутнасцю складу злачынства.

За чатыры месяцы высветлілася, што я не прысвойваў сродкі ТСЖ суме колькі там рублёў і колькі вось там капеек)

За чатыры месяцы і... пры дапамозе паднятага на вушы Бярозаўскага РАУС, прыкамандзіраванага супрацоўніка Берасцейскага ОБЭП, дванаццаці следчых Бярозаўскага раённага следчага камітэта і двух следчых Кобрынскага следчага камітэта.

Так і жывем... як на вулкане», - напісаў Аляксандр Кабанаў.

Нагадаем, крымінальную справу супраць блогера з Бярозы завялі 11 сакавіка. Яго спрабавалі абвінаваціць паводле часткі 1 артыкула «Прысваенне або растрата». Пра гэта раніцай 11 сакавіка «Брестской газеце» расказаў сам Кабанаў.

«Два гады таму я нядоўга быў старшынём ТСЖ. Тады я не жыў у гэтым доме, займаўся тынкоўкай скляпоў, і на адным са сходаў мяне ўгаварылі стаць старшынём, хоць бы на час, пакуль не разбяромся з скляпамі. Я адмаўляўся, яны намагалі. У выніку пагадзіўся на гэтую пасаду пры ўмове, што з кожнай кватэры за месяц буду атрымліваць 2 рублі заробку. А цяпер высвятляецца, што за 4 месяцы я атрымаў ад жыхароў 441 рубель 2 капейкі і прысвоіў гэтыя грошы», - распавёў блогер.

Справу распачалі паводле заявы, якую на яго напісаў сусед з дому, прапаршчык міліцыі. Нібыта Кабанаў узяў у яго 10 рублёў і не даў справаздачу, куды іх выдаткаваў.