Як беларускія чыноўнікі шукаюць новых «авечак для стрыжкі»

Жыхар Барысава распавёў пра дыскрымінацыю з боку ўладаў.

Чыноўнікі ўзмоцнена шукаюць сацыяльныя групы, з дапамогай якіх можна папоўніць дзіравы бюджэт. Беспрацоўныя, якія працуюць за мяжой, студэнты, салдаты... Спіс можна працягваць. Яшчэ пра адну групу беларусаў распавядае Telegram-каналу «Баста!» жыхар Барысава Юрый Яромкін.

- У 2011 годзе мне было прызначаная дапамога па доглядзе за маёй мамай, інвалідам 1 групы. 30 верасня 2016 года выплата дапамогі была спыненая, бо на той момант мне споўнілася 60 гадоў.

Ва Упраўленні працы, занятасцi i сацыяльнай абароны мне патлумачылі, што цяпер я аўтаматычна лічуся непрацаздольным і страчваю права на атрыманне дапамогі. Тады ж я не атрымаў права на атрыманне дзяржаўнай пенсіі па ўзросце, не хапіла некалькіх месяцаў неабходнага страхавога стажу. Перыяд догляду за інвалідам не залічваецца ў страхавы стаж, вучоба ў ВНУ таксама і гэтак далей.

На маё здзіўленае пытанне: «У якім статусе мяне варта цяпер разглядаць?» - супрацоўніца органаў сацабароны параіла мне прыйсці праз пяць гадоў для атрымання сацыяльнай пенсіі. Напэўна, тады мне трэба было сказаць ёй дзякуй за тое, што не запісалі ў «дармаеды».

Мне стала цікава, чаму па дасягненні агульнаўстаноўленага пенсіённага ўзросту людзі маюць права працягваць працаваць далей настаўнікамі, лекарамі, прадаўцамі, міністрамі, а вось права даглядаць за інвалідам не маюць.

Я прайшоў усе судовыя інстанцыі аж да Вярхоўнага суда. Адказы ўсюды былі аднолькавыя як пад капірку. Сумую:

1. У мяне няма права на атрыманне дапамогі, бо я непрацаздольны,

2. У мяне няма права на атрыманне сацыяльнай адраснай дапамогі, бо я працаздольны,

3. У мяне няма права на атрыманне пенсіі па ўзросту праз недахоп працоўнага стажу.

Супярэчнасці паміж вышэйазначанымі адказамі чыноўнікаў не бянтэжаць і не хвалююць.

Для сябе я разумеў, што такая з'ява выходзіць за рамкі простай дыскрымінацыі пэўнай даволі вялікай сацыяльнай групы людзей. За сваімі пажылымі сваякамі-інвалідамі даглядаюць тысячы беларусаў, якія па дасягненні пенсійнага ўзросту трапляюць у такую ж сітуацыю. Гэта генацыд у дачыненні да іх.

Эканамічны генацыд - сацыяльна небяспечная з'ява, якая выяўляецца ў збядненні і вымірання насельніцтва краіны ў выніку палітыкі ціску дзяржавы на ўзровень і якасць жыцця свайго ўласнага народа.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Баста» і стварайце гісторыю свабоднай Беларусі.