Лукашэнка: Мы з першых дзён канфлікту ў Сірыі былі на баку Асада

Дыктатар публічна выказаў сваю падтрымку ваеннаму злачынцу.

Пра гэта Лукашэнка 22 ліпеня на сустрэчы з намеснікам прэм'ер-міністра - міністрам замежных спраў і ў справах эмігрантаў Сірыі Валідам аль-Муалемам, паведамляе tut.by.

«Мы вельмі ўважліва сочым за сітуацыяй у Сірыі, за тымі падзеямі, якія разгортваюцца на вашай зямлі. Мы заўсёды, з першых дзён сірыйскага канфлікту, былі на баку сірыйскага народа, на баку вашага прэзідэнта. Мы ўсяляк падтрымлівалі справядлівую пазіцыю Сірыі, заўсёды будзем адданыя гэтай пазіцыі», - cказаў Лукашэнка.

Валід аль-Муалем перадаў Аляксандру Лукашэнку падзяку ад Башара Асада за падтрымку краіны ў гэты складаны для яе перыяд.

«Мы ўжо некалькі дзён знаходзімся ў Беларусі, і нам вельмі падабаецца той прагрэс, які дасягнуты дзякуючы вашаму кіраўніцтву. Мы сапраўды разлічваем на тое, што Беларусь будзе ўдзельнічаць у працэсе аднаўлення Сірыі, і дамо прыярытэт усім беларускім кампаніям, якія жадаюць у гэтым удзельнічаць», - запэўніў міністр.

Нагадаем, дыктатар Башар Асад - ваенны злачынец, які выкарыстоўваў хімічную зброю супраць грамадзян сваёй жа краіны. У 2018 годзе сілы Асада ўжылі хімічную зброю ў Думе, дзе загінулі ад 46 да 70 чалавек і сотні чалавек пацярпелі.