Fitch незадаволеная якасцю актываў беларускіх банкаў

Беларускія банкі па-ранейшаму адчувальныя да патэнцыйных макраэканамічных стрэсаў.

Вядомыя звесткі аб МСФС пацвярджаюць, што якасць актываў беларускіх банкаў па-ранейшаму слабая, а абхват рэзервамі невысокі, гаворыцца ў паведамленні Fitch Ratings, піша officelife.

Якасць актываў асабліва ўразлівая да зніжэння курсу нацыянальнай валюты з улікам высокай долі крэдытаў у замежнай валюце (48% на канец першага квартала 2019 года), істотная частка якіх прадстаўленая пазычальнікам са слабай крэдытаздольнасцю або валютнымі даходамі, недастатковымі для абслугоўвання пазыкі.

Аналіз звестак аб МСФС 10 банкаў, на якія прыпадае 93% актываў у сектары, сведчыць, што сярэднеўзважаны паказчык крэдытаў трэцяй стадыі, якія ўключаюць непрацуючыя крэдыты, абясцэненыя крэдыты і іншыя праблемныя крэдыты, складаў 11,9% валавых крэдытаў на канец 2018 года. Крэдыты другой стадыі (іншыя крэдыты з істотным павелічэннем крэдытнай рызыкі) складалі яшчэ 18,6%.

Гэтыя паказчыкі адпавядаюць верхнім узроўням аналагічных паказчыкаў у краінах рэгіёну СНД, што адлюстроўвае наяўнасць значнай рызыкі ў беларускіх банкаў на прадпрыемствы дзяржсектара з высокай пазыковай нагрузкай і іншых пазычальнікаў са слабымі фінансавымі профілямі. На гэтыя паказчыкі, зрэшты, уплываюць значныя аб'ёмы ў дзяржбанкаў дырэктыўных крэдытаў, атрыманых у спадчыну з папярэдніх перыядаў.

«Істотнае паляпшэнне якасці актываў у кароткатэрміновай перспектыве малаімавернае з улікам запаволення эканомікі Беларусі. Нават сярэдні ўзровень макраэканамічнага стрэсу ці зніжэння курсу нацыянальнай валюты можа прывесці да пераходу істотна большай колькасці крэдытаў у катэгорыі другой і трэцяй стадыі», - гаворыцца ў дакладзе.

Кампенсацыя рэзервамі крэдытаў трэцяй стадыі была ніжэйшай за 20% у буйных дзяржаўных банкаў, што часткова адлюстроўвае наданне дзяржаўнай падтрымкі некаторым пазычальнікам з дзяржсектара, каб дапамагчы ім ажыццяўляць свае аплаты. Большасць банкаў пры неабходнасці магла б цалкам зарэзерваваць свае крэдыты трэцяй стадыі за кошт гадавога прыбытку да адлічэнняў пад абясцэненне. У той жа час запасы капіталу з'яўляюцца невялікімі і адчувальныя да пагаршэння якасці крэдытаў другой стадыі, якія з'яўляюцца значнымі і агулам толькі на 11% кампенсаваныя створанымі па іх рэзервамі.

Аб'ём высокаліквідных і размешчаных за межамі Беларусі валютных актываў з'яўляецца невысокім, і кіраванне валютнай ліквіднасцю залежыць ад даверу ўкладчыкаў (дэпазіты маюць высокую далярызацыю) і здольнасці банкаў рэфінансаваць сваю вонкавую пазыку. Будучыя выплаты па-ранейшаму з'яўляюцца значнымі, асабліва ў дзяржаўных банкаў. Мы чакаем, што ў выпадку неабходнасці ўлады зробяць даступнай для дзяржаўных банкаў частку валютнай ліквіднасці, інвеставанай у дзяржаўныя валютныя аблігацыі. Рызыкі ліквіднасці ніжэйшыя ў банкаў замежнай уласнасці з прычыны наяўнасці доступу да фандавання ад матчыных структураў.