Tages anzeiger: Блізкасць да Масквы можа дорага абысціся Сальвіні
4- 17.07.2019, 13:02
- 8,242
Віцэ-прэм'ер Італіі трапіў у скандал праз сувязі з РФ.
"Матэа Сальвіні доўгі час ганарыўся сваімі сувязямі з Крамлём. (...) Але цяпер блізкасць да Масквы можа яму дорага абысціся", – піша швэйцарскае выданне Tages-Anzeiger, (пераклад – inopressa.ru).
«Пакуль яшчэ незразумела, ці звязаныя магчымыя непрыемнасці з ягонай палітычнай наіўнасцю або з меркавана злачыннай фінансавай сквапнасцю на карысць сваёй партыі. Абедзве трактоўкі дыскваліфікуюць яго, – адзначае аўтар артыкула Олівер Майлэр. – Італьянская юстыцыя вывучае падазрэнне, згодна з якім пасланнікі Сальвіні задумалі нафтавае пагадненне з расейскімі агентамі, дзякуючы якому ў касу "Лігі Поўначы" павінны былі паступіць 65 млн даляраў».
"Праванацыяналістычная еўрапейская ўрадавая партыя, якая штодня прапаведуе суверэнізм і выкрывае Брусэль... прадае Крамлю сябе і тым самым краіну, – паказвае выданне. – Гэта, верагодна, магло б зрынуць і самога Сальвіні, пра якога раней усе думалі, што яму нічога не можа нашкодзіць".
Пры гэтым, прадаўжае Майлэр, сувязі Рыма з Масквой – не вынаходка Сальвіні. Так, расейскі "цар" асабліва добра ладзіў з Сільвіа Берлусконі. "Абодва сустракаліся на роўных", – кажа Серджа Рамана, былы амбасадар Італіі ў Маскве і экс-прадстаўнік краіны пры NATO.
"Сальвіні, у сваю чаргу, – хлопчык на пабягушках для Пуціна", – кажа Рамана. Фанат, якія зробіць усё дзеля сэлфі з зоркай. Іх стасункі, на думку дыпламата, цалкам асіметрычныя. Для Пуціна Сальвіні – толькі адзін з многіх інструментаў, якія ён выкарыстоўвае для таго, каб нашкодзіць Еўрапейскаму Звязу. Можна таксама сказаць: Сальвіні – пуцінскі паслугач", – гаворыцца ў артыкуле.
У Італіі цяпер задаюцца пытаннем, чаму аўдыязапіс перамоваў быў агучаны толькі цяпер. "Здагадак шмат, адна з іх: Масква, верагодна, раззлавалася таму, што нядаўна Сальвіні схіляўся ў Вашынгтоне перад Дональдам Трампам, іншым сваім кумірам. (...) Як бы там ні было: вонкавапалітычныя дылетанты Рыма – авантурысты на сусветнай арэне. А самую вялікую рызыку нясе Італія", – вынікуе Tages-Anzeiger.
