Змены ў страхаванні: выявіўся нечаканы сюрпрыз для кіроўцаў

Нюанс тычыцца большасці аўтаўладальнікаў.

У траўні быў падпісаны ўказ, у якім зафіксаваны змены ў прававых нормах, якія тычацца страхавання. Многія аўтамабілісты ўжо ведаюць, што сума страхавой выплаты пры афармленні ДТЗ без выкліку ДАІ (еўрапратакол) павышаная з 400 да 800 еўраў. Аднак ёсць яшчэ адзін нюанс, які тычыцца большасці аўтаўладальнікаў. І гаворка ідзе пра прадмет даўніх скаргаў - занадта нізкія выплаты «на рамонт», піша onliner.by.

«Разлік кошту аднаўленчага рамонту пашкоджаных дэталяў будзе ажыццяўляцца без уліку зносу пры замене пашкоджаных дэталяў стырнавога кіравання, тармазной сістэмы, сістэм актыўнай бяспекі (згодна з пералікам, зацверджаным Беларускім бюро транспартнага страхавання), - паведаміў Сяргей Асенка, начальнік галоўнай управы страхавога нагляду Мінфіна РБ. - Звярну ўвагу: калі страхавы выпадак надыдзе пасля 31 жніўня гэтага года (гаворка пра дамовы, укладзеныя да 1 верасня 2019 года. - заўвага Onliner), сума шкоды і выплат будзе вызначацца паводле новых умоў».

«Норма «без зносу» звязаная з пытаннямі бяспекі. Стырнавая, тармазная сістэма, сістэма актыўнай бяспекі - элементы і дэталі гэтых сістэм павінны быць заўсёды спраўнымі і, пажадана, новымі. Таму пастанавілі пайсці на такі крок. Каб людзі на аўто пасля ДТЗ ставілі новыя дэталі, а не ўжываныя. Канкрэтны пералік дэталяў знаходзіцца ў працэсе ўзгаднення з вытворцамі», - дадаў Сяргей Рабецкі, намеснік гендырэктара Беларускага бюро ў транспартным страхаванні.

Таксама стала вядома, што зменшаць унёскі паводле дамоў унутранага страхавання для электрамабіляў (з 43,1 еўра да 23,9 еўра на год), гібрыдаў (з 59,7 да 33,2 еўра на год) - практычна на 40 адсоткаў.

Пашыраны і спіс так званых «страхавых выпадкаў». Такімі з гэтага часу будуць звацца і ДТЗ, якія здарыліся ў месцы, не прызначаным для дарожнага руху (напрыклад, у полі ці лесе), калі ДАІ аформіць інцыдэнт як дарожна-транспартнае здарэнне. Таксама страхавым выпадкам будуць прызнаваць падзенне грузу з аўтамабіля.

Новаўвядзенні набудуць моц з 1 верасня.