Чыж выводзіць свае актывы: на яго запісаны толькі адзін жылы дом

Япрынцаў падаў яшчэ адзін пазоў супраць свайго экс-партнёра.

Суд Цэнтральнага раёна Менска ў аўторак пачаў разгляд пазову Уладзіміра Япрынцава да экс-партнёра па «Трайплу» Юрыя Чыжа, паведамляе карэспандэнт tut.by.

Як і ў папярэднім пазове, ужо задаволеным судом, гаворка ідзе пра грошы за прададзеныя акцыі лагістычнай кампаніі ЗАТ «Аскаргатэрмінал». Угода аб продажы дзеляў у кампаніі, якой валодалі Уладзімір Япрынцаў (60%) і Святлана Чыж (40%), жонка Юрыя Чыжа, была ўкладзеная 11 жніўня 2015 года, у дзень затрымання Япрынцава. Грошы на рахунак Япрынцава паступілі некалькімі аплатамі, агулам крыху больш за 100 тысяч даляраў у эквіваленце (219,2 тысячы дэнамінаваных рублёў). У момант залічэння грошай на рахунак ён ужо быў у СІЗА, і з ранейшай інфармацыі, уся маёмасць і рахункі былі арыштаваныя. Але грошы выявіліся знятымі.

Бухгалтарка «Трайпла» Элеанора Леўкіна, якая мела даверанасць на аперацыі з рахункам і ад Япрынцава, і ад Чыжа, у судзе пацвердзіла, што грошы з рахунку Япрынцава здымала гатоўкай на даручэнне Юрыя Чыжа і перадавала яму блізу 86 тысяч даляраў і 45 тысяч у жніўні і верасні 2015 года. Сам уладальнік рахунку ёй такіх указанняў не даваў. Яшчэ тройчы сумы па 40 тысяч даляраў яна пералічвала на рахунак юрыдычнай асобы.

З тлумачэнняў Юрыя Чыжа, якія ён даваў падчас правядзення праверкі УУС Партызанскага раёна Менска, сродкі з рахунку Япрынцава-старэйшага ён перадаў крэдыторам сына Япрынцава, расейскім бізнэсоўцам Іосіфу Аксенцьеву і Міхаілу Маміяшвілі.

У снежні мінулага года суд задаволіў пазоў Япрынцава на частку сумы, 1960 рублёў. З улікам дзяржпадатку і кампенсацыі юрыдычных выдаткаў Чыж завінаваціўся Япрынцаву 3208 рублёў (адвакат Япрынцава адзначыла, што распачатая выканаўчая справа - цалкам пастановы не выкананыя). Суд вызначыў запатрабаваць матэрыялы грамадзянскай справы аб спагнанні часткі сумы з Чыжа на карысць Япрынцава.

Цяперашні пазоў пададзены на астатнюю суму - 217,3 тысячы рублёў.

Пазоўнік мяркуе, што адказчык ведаў пра ўзбагачэнне першапачаткова і адпаведна разлічыў суму адсоткаў, якія падлягаюць да спагнання, з дня, наступнага пасля спісання грашовых сродкаў з разліковага рахунку. Сума адсоткаў за карыстанне чужымі грашовымі сродкамі складае 57,1 тысячы рублёў.

У пазове звяртаецца ўвага на тое, што шматлікія перамовы, якія праводзяцца ў тым ліку ў рамках судовага разбору, не далі станоўчых вынікаў. Пры гэтым стала вядома, што Юрый Чыж ужыў захады, накіраваныя на вывядзенне сваіх актываў. Дарэчы, на момант складання пазову толькі адзін аб'ект належаў Чыжу на праве ўласнасці: аднакватэрны жылы дом у пасёлку Лагожэску (без уліку долі ў ТАА «Трайпл»).

«Мяркуем, дастаткова падстаў уважаць, што невыкарыстанне захадаў для забеспячэння пазову можа зрабіць цяжкім або немагчымым выкананне пастановы суда Цэнтральнага раёна Менска ў гэтай справе, што ў сваю чаргу можа пацягнуць для пазоўніка значную шкоду», - гаворыцца ў пазове.

Пазоўнік прасіў суд прыняць да ўвагі, што адсутнічае ўсякая іншая інфармацыя аб наяўнасці якой-небудзь іншай маёмасці, за кошт чаго маглі б быць задаволеныя пазоўныя патрабаванні Уладзіміра Япрынцава ў гэтай справе.

Суд ужыў захады да забеспячэння пазову і наклаў арышт у межах кошту пазову на маёмасць, якая належыць адказчыку.

Ад міравога пагаднення прадстаўнік Чыжа адмовіўся.

Нагадаем, цяперашні пазоў - не адзіны паміж партнёрамі па «Трайплу». Эканамічны суд Менска разглядае пазоў Япрынцава да Аксенцьева аб прызнанні дамовы куплі-продажу яго долі ў «Трайпла» неўкладзенай. Толькі доля Япрынцава ў «Трайпле», якая дасталася Аксенцьеву і Маміяшвілі, паводле ацэнак экспэртаў, перакрывала суму пазыкі і складала блізу 50 млн даляраў.