Кудрын: Расеі пагражае сацыяльны выбух

Галоўная праблема - нежаданне вышэйшага кіраўніцтва РФ рэфармаваць эканоміку і, як следства «ганебная беднасць».

Хранічнае падзенне даходаў насельніцтва дае падставу турбавацца пра пагрозу паўнавартаснага «сацыяльнага выбуху» ў Расеі, у той час як кіраўніцтва краіны не гатовае да рэформаў, а эканоміка імкліва «рухаецца назад».

Такое меркаванне ў эфіры праграмы «Познер» на Першым канале выказаў кіраўнік Падліковай палаты Аляксей Кудрын.

«Беднасць ў Расеі стала ганьбай», - цытуе інтэрв'ю Кудрына ТАСС: за час крызісу ўзровень жыцця ўпаў «амаль на 9%», і цяпер каля 12,5% насельніцтва Расеі (18,9 мільёна чалавек, згодна з Расстат) знаходзіцца за рысай афіцыйнай галечы - гэта людзі, даходы якіх меншыя за пражытачны мінімум, які складае 10454 рублі ў сярэднім па краіне.

«Гэта страта у тым ліку ў функцыянальным развіцці, у харчаванні, якасці жыцця, здароўі, гэта праблема нашага чалавечага капіталу», - канстатаваў Кудрын.

Прычына такога становішча спраў не ў падзенні коштаў нафты і не ў санкцыях, «якія ў нас нешта адбіраюць, памяншаюць наш патэнцыял», падкрэсліў ён. Галоўная прычына - гэта неэфектыўнасць дзяржаўнага кіравання, праз што эканоміка страчвае канкурэнтаздольнасць, а з ёй - і долю ў сусветным ВУП.

«Мы вельмі марудна рэагуем на задачы, якія ставяць выклікі жыццю. Мы вельмі неэфектыўныя, забюракратызаваныя», - пералічыў Кудрын, дадаўшы, што да некаторых крокаў, неабходных для развіцця, кіраўніцтва краіны «не гатовае, не здольнае» і, магчыма, «не мае палітычнай волі».

Але стан стабільнасці, пераўтвораны ў фетыш дзяржаўнай прапаганды, - з'яўляецца, на думку Кудрына, «ілжывай устойлівасцю», таму што эканоміка рухаецца ў кірунку, прама процілеглым развіццю.

«У нас павялічваецца доля дзяржавы ў эканоміцы, памяншаецца канкурэнцыя, памяншаецца прыватная ініцыятыва, у нас чарговыя кампаніі трапляюць ва ўласнасць дзяржкампаній або дзяржавы. Гэта рух назад», - панаракаў Кудрын.

Паступова развальваецца сістэма адукацыі, на якую федэральны бюджэт вылучае 860 млрд рублёў у год - у 3,7 разы менш, чым на войска (3,178 трлн рублёў), у 2,6 разы менш, чым на паліцыю (2,24 трлн рублёў), і амаль удвая ніжэй за асігнаванне на фінансаванне апарата чыноўнікаў (1,625 трлн рублёў).

«Наша адукацыя ўжо цяпер адстае ад найлепшых узораў у свеце. Мы не рыхтуем людзей да сучаснай, новай эканомікі», - заявіў Кудрын.

З ягоных слоў, неабходна істотнае павялічыць фінансаванне адукацыі, а таксама рэзка павялічыць сацыяльную дапамогу маламаёмасным, каб разам скараціць узровень беднасці на 30-40%.

Сума, якая неабходна для гэтага, «пасільная федэральнаму бюджэту», падкрэсліў Кудрын: яго прафіцыт паводле вынікаў мінулага года склаў 2,746 трыльёна рублёў, а за студзень-травень 2019-га яшчэ 1,15 трыльёна рублёў.

Гэтыя грошы ўрад у поўным аб'ёме накіраваў на скупку валюты, якая складуецца ў Фондзе нацыянальнага дабрабыту і дадаецца да міжнародных рэзерваў РФ, якая дасягнула ў пачатку чэрвеня 5-гадовага максімуму - больш за 500 млрд даляраў.