«Я самотная маці, а вы па 50 капеек прапаноўваеце! А я хачу па 1,5 рубля!»

Што адбываецца на клубнічных рынках.

- Я адзінокая маці! А вы прыязджаеце і мне тут па 50 капеек прапануеце. Я хачу па паўтара рубля! А вы пачынаеце лаяцца! - крычыць жанчына на пакупнікоў трускалак на рынку ў Дварцы ў Лунінецкім раёне, піша kp.by.

Канфлікт адбыўся, калі на рынку абрынуліся кошты. Ягады прымалі смешным коштам - 30 - 50 капеек за кілаграм. Людзі, якія вырошчваюць клубніцы і здаюць іх на рынку, былі, мякка кажучы, не задаволеныя. Нават выкідалі іх пад ногі, выказваючы тым самым пратэст - хай лепш згніюць, але аддаваць плён сваёй цяжкай працы за такія капейкі не будзем.

Тыя, хто вырошчвае клубніцы, мяркуюць, што пакупнікі на іх нажываюцца. Тыя ў сваё апраўданне толькі разводзяць рукамі - трускалак сёлета занадта шмат, такі кошт устанавіў свабодны рынак. Да таго ж гэтыя трускалкі няма куды падзець: нарыхтоўшчыкі трускалкамі мала цікавяцца.

- Амаль усе наймаюць на ўборку ўраджаю людзей. Чалавек можа сабраць 12 - 18 кг за гадзіну, плацяць 3,5 - 4,5 рубля за гадзіну. Сабекошт збору трускалак выходзіць блізу 30 капеек за кілаграм. І калі на рынку быў перыяд, што за адборныя ягады давалі 60 капеек, а 20 капеек - за ягады, якія пачалі трохі падцякаць, на віно іх бяруць, то людзі псіхавалі, казалі: «Ну гэтыя ягады, усе перакапаем, пасадзім бульбу!» - распавядае дырэктар клубнічнага рынка Ігар Пракаповіч.