У ЕЗ паабяцалі падтрымку новаму ўраду Малдовы
2- 16.06.2019, 15:38
- 7,388
Еўрапейскі Звяз вітаў мірную перадачу ўлады ў Малдове.
Еўракамісар у пытаннях еўрапейскай палітыкі суседства і перамоў для пашырэння Ёханэс Хан вітаў мірную перадачу ўлады ў Малдове і паабяцаў новаму ўраду падтрымку ЕЗ.
Пра гэта гаворыцца ў паведамленні Еўракамісіі пасля размовы Ёханэса Хана з прэм'ерам Малдовы Маяй Санду, паведамляе «Европейская правда».
«Камісар вітае мірную перадачу ўлады і тыя крокі прэм'ер-міністра Санду, якія яна ўжо зрабіла для пачатку ажыццяўлення праграмы рэформаў урада. Ён таксама высока ацаніў намер прэм'ер-міністра прасоўваць самыя тэрміновыя рэформы, у тым ліку тыя, якія раней абмяркоўваліся з ЕЗ», - гаворыцца ў паведамленні.
Камісар Хан таксама падкрэсліў гатоўнасць Еўрапейскага Звязу працаваць з новым малдаўскім урадам.
«Улады Малдовы адразу атрымаюць дапамогу і падтрымку ЕЗ, як толькі пачнуць працу на карысць грамадзян, спрыяць вяршэнству закона і забяспечваць плюралізм меркаванняў у СМІ», - гаворыцца ў паведамленні Еўракамісіі.
І Хан, і Санду таксама пацвердзілі ўзаемную прыхільнасць умацаванню і паслядоўнаму ажыццяўленню пагаднення аб асацыяцыі Малдовы і ЕЗ.
Нагадаем, 14 чэрвеня Дэмпартыя Малдовы заявіла аб тым, што адмаўляецца ад улады, каб краіна магла выйсці з палітычнага крызісу.
Новы ўрад краіны прызналі ключавыя дзяржавы ЕЗ.