Трамп дапусціў павелічэнне кантынгенту ЗША ў Польшчы ў паўтара раза
2- 12.06.2019, 20:23
- 8,355
Такую заяву прэзідэнт ЗША зрабіў перад пачаткам перамоў з польскім калегам Анджэем Дудам.
Выступаючы перад журналістамі, кіраўнік Белага дома распавёў, што канчаткова пытанне аб павелічэнні амерыканскай вайсковай прысутнасці ў Польшчы не вырашанае, аднак сам ён абдумвае магчымасць перакідання туды з Нямеччыны дадаткова 2 тысячы вайскоўцаў, паведамляе агенцтва Reuters.
У выпадку станоўчага развязання гэтага пытання агульная колькасць амерыканскіх вайскоўцаў у Польшчы павялічыцца ў паўтара раза і дасягне 6 тысяч.
Амерыканскі прэзідэнт паводле вынікаў сустрэчы з Дудам таксама адзначыў, што Польшча пагадзілася набыць у ЗША «шмат самалётаў F-35».
Раней выданне Defence One і Financial Times паведамлялі аб тым, што падчас візіту ў ЗША Дуда разлічваў дамовіцца аб павелічэнні амерыканскага кантынгенту на 1 тысячу чалавек у якасці абароны ад расейскай пагрозы.