Навукоўцы раскрылі яшчэ адну загадку Антарктыды
5- 12.06.2019, 13:55
- 20,224
Чаму ў Антарктыдзе з'яўляецца глыбінная палонка нават пры -50°С?
Антарктычная глыбінная палонка ў моры Уэддэла, якую ўпершыню заўважылі ў 1974 годзе, з'яўляецца праз падлёдную салёную плынь і моцныя вятры. Да такой высновы прыйшла міжнародная група кліматолагаў, піша «Хайтек».
Гіганцкую палонку агульнай плошчай, большай за Маскоўскую вобласць, знайшлі ў антарктычным моры Уэддэла ўпершыню ў 1974-1976 гадах. Пасля гэтага яе не было амаль 40 гадоў, аднак у 2017 годзе яна з'явілася зноў.
Палонка вельмі зручная для экасістэмы Антарктыды - цюлені і пінгвіны могуць у ёй паляваць, а марскія жывёлы - атрымаць доступ да кіслароду. Аднак навукоўцы не маглі зразумець прыроду гэтай палонкі, бо ў тым рэгіёне не было фактараў, якія маглі б прывесці да такой з'явы.
Кліматолагі і гляцыёлагі дзесяцігоддзямі вывучалі мора Уэддэла, усталёўвалі рабатызаваныя буі, параўноўвалі здымкі са спадарожнікаў і звесткі з карабельных экспедыцый.
Выявілася, што гіганцкая палонка можа з'яўляцца ў выпадку набору розных фактараў - моцнага ветру, які б мог зрушваць цяжкія крыгі ў розныя бакі, і вельмі салёнай вады з падвышанай тэмпературай, якая дазволіла б мору не застываць нават палярнай ноччу.
Апошнім разам цёплае цячэнне знаходзілася ля паверхні мора Уэддэла даўжэй чым звычайна. Навукоўцы звязваюць гэта з глабальным пацяпленнем.