Бацькі распавялі пра затрыманага ў Стоўбцах сына і паказалі яго пакой

Яны патлумачылі, адкуль узяліся піратэхніка і нож, якія знайшлі ў сына.

Каб атрымаць паказанні, АМАПаўцы паклалі Вадзіма на падлогу ў мікрааўтобусе і заломлівалі яму рукі. Пра гэта распавялі «Радыё Свабода» бацькі 15-гадовага жыхара Стоўбцаў, затрыманага ўчора за двайное забойства ў школе. Яны патлумачылі, адкуль узяліся піратэхніка і нож, якія знайшлі ў сына. І чаму той хацеў стаць адвакатам. Таксама яны паказалі пакой Вадзіма.

Бацька Віталь М. прысутнічаў пры затрыманні сына ў панядзелак. Ён шукаў Вадзіма разам з міліцыяй. Менавіта бацька заўважыў Вадзіма на вуліцы і паклікаў яго.

«Міліцыя ачапіла іншы дом, але сына там не было. Яго не ў пад'ездзе затрымалі. Ён сам падышоў і здаўся. Ён не ўцякаў», - кажа Аксана М., маці Вадзіма.

Бацька Віталь М. учора быў на трохгадзінным допыце сына. Ён кажа, Вадзім адмаўляецца даваць паказанні. На ўсе пытанні ён адказвае «не ведаю» і «не памятаю».

«Я не пазнаў сына, ён увесь белы быў», - сказаў Віталь.

Вадзім распавёў свайму адвакату і бацьку, што яго жорстка затрымлівалі. Калі АМАП зацягнуў хлопца ў мікрааўтобус, яго паклалі на падлогу, усталі нагамі на спіну і сталі заломліваць рукі.

«З яго выбівалі паказанні, - сказаў бацька. - Усё, што яны патрабавалі, ён казаў. Але сінякоў у яго не было. Сталі так, каб не было».

Сёння бацьку ўвечары выклікалі следчыя на чарговы допыт.

У папярэднія дні бацькі нічога незвычайнага за сынам не заўважалі. Вадзім заўсёды заставаўся дома, рэдка куды хадзіў пасля школы. Апошнія выходныя перад трагедыяй таксама правёў дома. Часам ён ездзіў у нядзелю ў лазню, але гэтым разам адмовіўся.

У школе на яго паводзіны не скардзіліся. Бацька не памятае, каб сын кагосьці збіваў. Толькі успамінае, як у восьмым класе Вадзіма збілі ў прыбіральні іншыя школьнікі. Але Віталь тады пагаварыў з бацькамі тых дзяцей, і працягу ў гісторыі не было.

Хлопец не піў і не паліў.

«Я сам не палю і моцна адчуваю пах тытуню. Ад Вадзіма ніколі не пахла», - сказаў бацька.

Са слоў Віталя, яго сын фізічна моцны. Дома ў яго былі гантэлі.

«Не паверыце, але ён мог 100 разоў падцягнуцца», - кажа Віталь.

Бацька ніколі не чуў, каб у Вадзіма былі праблемы ў школе. Ён добра вучыўся, сямёркі ў дзённіку лічыліся дрэннай ацэнкай.

«Бо я ведаю, што ён можа і лепш вучыцца», - сказала маці.

Калі ён быў у 8-м класе, за паспяховую вучобу настаўнікі прапаноўвалі перавесці Вадзіма ў клас, дзе навучаюцца больш падрыхтаваныя дзеці. Але Вадзім сам адмовіўся, наважыў застацца ў класе з сябрамі.

Пасля школы ён збіраўся вучыцца на адваката. На наступны год бацькі ўжо думалі, што трэба будзе наймаць рэпетытараў для паступлення на юрыдычную спецыяльнасць.

«Ён казаў, што хоча людзей абараняць. - сказала маці. - А на пракурора не хацеў, хацеў вызваляць людзей, а не саджаць».

Але бацькі кажуць, што пры ягонай цікаўнасці да анатоміі, яму варта было б падумаць пра прафесію хірурга.

«Ён вельмі шмат любіў чытаць. Асабліва энцыклапедыі па анатоміі», - кажа маці Аксана.

Пра забітага Аляксандры Р. бацька даведаўся толькі з навін. Але чаму яго сын напаў на таго хлопца, ён не ведае.

«Разумееце, не можа проста так гэта быць, - кажа Віталь. - Той хлопец сядзеў за апошняй партай, і Вадзім жа пайшоў менавіта да яго».

Таксама Віталь не чуў, каб у сына былі праблемы з настаўніцай Марыяй Пархімовіч.

Следчыя забралі з дому кампутар і тэлефон Вадзіма. Пра знойдзеную ў хлопца піратэхніку бацька ведае. Гэта каляровыя дымавыя шашкі, якія ляжалі ў іх дома. Ён сам іх купляў на Новы год.

«Я пыталася ў следчых, чаму тады бенгальскія агні не забралі», - кажа Аксана.

А вось нажа, якім Вадзім забіў дваіх чалавек, дома не было. Гэта складаны ножык, якога Віталь раней не бачыў.

Бацька кажа, што адразу не паверыў, што яго сын кагосьці забіў, бо той заўсёды быў вельмі ціхім і спакойным.

«Я размаўляла з класным кіраўніком і дырэктарам, і яны таксама не разумеюць, як Вадзім мог такое зрабіць. Ніхто ў гэта не можа паверыць», - сказала маці.