Колькі гадоў спатрэбілася ўладам, каб скасаваць талон да пасведчання кіроўцы
11- 31.12.2019, 17:32
- 21,662
Гэтыя старамодныя дакументы даўно з'яўляліся атавізмам савецкай сістэмы.
«Пад ялінку» Лукашэнка падпісаў указ №492, якім «карэктуецца пералік адміністрацыйных працэдур», і касуюцца талоны да пасведчання кіроўцы і сертыфікаты аб праходжанні тэхагляду, піша «Салідарнасць».
Гэтыя састарэлыя дакументы даўно з'яўляліся атавізмам савецкай сістэмы. Міжнародныя правілы маюць на ўвазе наяўнасць аднаго толькі пасведчання кіроўцы і ніякіх больш дадаткаў!
Але беларускія ўлады ўпарта трымаліся за старое. Талоны не касавалі нават з увядзеннем у 2011 годзе новага ўзору пасведчання кіроўцы, які адпавядае патрабаванням Венскай канвенцыі аб дарожным руху.
Дарэчы, у тым жа 2011-м ад талонаў пазбавілася Украіна. Але беларуская бюракратычная машына гарой стаіць за кожную паперку!
Лёд крануўся ў пачатку 2017 года. Высветлілася, што праект дакумента аб скасаванні талонаў да пасведчання кіроўцы знаходзіцца на ўзгадненні ва ўрадзе.
З тых часоў прайшло яшчэ блізу трох гадоў і - бінга! - усе неабходныя візаванні былі атрыманыя. Хуткасць чыноўніцкага апарату ўражвае.
Так, глядзіш, гадоў праз дзесяць у Беларусі і біяметрычныя пашпарты пачнуць выдаваць.