Новым грамадзянам Украіны дазволяць мець два пашпарты

Паслаблення не будуць тычыцца краін міграцыйнай рызыкі, уключаючы Расею.

Кіраўнік Дзяржаўнай міграцыйнай службы Украіны Максім Сакалюк заявіў, што будзе скасаванае абавязковае патрабаванне аб спыненні замежнага грамадзянства для атрымання пашпарта грамадзяніна Украіны.

Аднак норма аб «адзіным грамадзянстве» ў Канстытуцыі Украіны застанецца ў дзеянні, заявіў ён у інтэрв'ю «Европейской правде».

«Канстытуцыйная норма пра «адзінае грамадзянства» захаваецца: яна азначае, што мы і далей будзем успрымаць людзей як грамадзян толькі Украіны, нягледзячы на тое, ці маюць яны таксама пашпарт іншай дзяржавы. А змена будзе ў тым, што мы не будзем патрабаваць выхаду з іншага грамадзянства для атрымання ўкраінскага пашпарта», - распавёў Сакалюк.

Кіраўнік ДМС дадаў, што паслаблення не будуць тычыцца краін міграцыйнай рызыкі, уключаючы Расею.

Нагадаем, прэзідэнт Украіны Уладзімір Зяленскі ўнёс у Вярхоўную Раду праект закона аб унясенні змяненняў у некаторыя законы Украіны адносна пытанняў грамадзянства.

Законапраектам №2590 прапануецца спрасціць атрыманне ўкраінскага грамадзянства некаторымі замежнікамі.

Віцэ-прэм'ер-міністр у пытаннях еўрапейскай і еўраатлантычнай інтэграцыі Украіны Дзмітрый Кулеба выступіў за ўзаконьванне падвойнага грамадзянства, але не для тых грамадзян, якія разам з украінскім маюць пашпарт РФ.