У Баранавічах пратэставалі таксісты

Сітуацыя з пасажырскімі перавозкамі ў краіне - крытычная.

Блізу 25 аўто сэрвісу «Яндекс.Такси» з'ехаліся 13 снежня да Гандлёвага цэнтра «Легіён» у Баранавічах, піша intex-press.by.

Яны збіралі подпісы пад петыцыяй у Мінтранспорта і камунікацый з просьбай звярнуць увагу на «крытычную сітуацыю" ў галіне пасажырскіх перавозак аўтамабілямі таксі і ўнеслі свае прапановы па яе паляпшэнню.

Паўтара месяца таму кіроўцы сэрвісу «Яндекс.Такси» пратэставалі каля гіпермаркета «Карона», дзе выказвалі сваю нязгоду з новаўвядзеннямі кампаніі: скасаваннем бонусаў, павышэннем камісіі за паездку і, як следства, зніжэннем заробку.

А не знайшоўшы паразумення з сэрвісам, кіроўцы наважылі прыцягнуць увагу да праблемы Мінтранспорта. Кіроўцы, якія падпісалі петыцыю паведамляюць міністэрству, што «ажыццяўленнем перавозак пасажыраў займаецца з большага хто трапіў, гэта значыць людзі, якія не выконваюць элементарных правіл»; аўтамабілі не адпавядаюць патрабаванням, што выстаўляюцца службам таксі; выпадкі ДТЗ сведчаць пра адсутнасць стажу і досведу ў кіроўцаў; у незаконных перавозках удзельнічаюць аўтамабілі без тэхагляду.

Кіроўцы, якія выкарыстоўваюць сэрвіс «Яндекс.Такси», уносяць свае прапановы, якія, на іх думку, палепшаць сітуацыю ў галіне пасажырскіх перавозак.

- Мы хочам, каб кожны перавозчык быў легальным таксістам, - распавядае Аляксей Шугаеў, стваральнік петыцыі. - Гэта значыць прайшоў адпаведныя курсы, ездзіў з таксометрам, які будзе на ўліку ў падатковай, атрымаў ліцэнзію на гэтую працу ў Міністэрстве транспарту, а таксама каб па вонкавым выглядзе аўто было зразумела, што гэта таксі.

У складзенай петыцыі кіроўцы просяць увесці квоты на колькасць ліцэнзій на населены пункт, у залежнасці ад колькасці жыхароў; выдаваць ліцэнзіі персанальна кіроўцам; «Спрасціць аплату дарожнага падатку два разы на год», пацвярджаць тэхнічны стан аўто без дадатковага грашовага збору і іншае.

- Акрамя гэтага, мы хочам, каб стаўка працэнта ад кошту замовы для службаў, сэрвісаў і іншых пастаўшчыкоў была сумленнай і фіксаванай, - кажа Аляксей.

У петыцыі таксама выказваецца пажаданне «арганізаваць сумесныя рэйды МПЗ, ДАІ і супрацоўнікаў транспартнай інспекцыі штодня і кругласутачна. Праводзіць рэйды ў любы час, а не ў перыяд з панядзелка па пятніцу, 8.30 да 16.30», - гаворыцца ў петыцыі.

- Маю петыцыю падпісалі больш за трыццаць кіроўцаў «Яндекс.Такси», якія хочуць законных пасажырскіх перавозак, добрых умоў працы і годнага заробку, - распавёў Аляксей Шугаеў. - У найбліжэйшыя два тыдні я планую працягнуць збор подпісаў таксістаў, якія падтрымаюць гэтую ініцыятыву.

Пасля гэтага Аляксей Шугаеў, актывіст і кіроўца службы «Яндекс.Такси», плануе адправіць падпісаную петыцыю ў Мінтранспорта.