«Дырэктар забрала дошку, таму што бацькі не заплацілі»

Дзіўнае відэа з гомельскай школы.

Сёння ў сацыяльных сетках з'явілася незвычайнае відэа з школьнага класа. Мяркуючы па подпісу, справа адбываецца ў 25-й школе Гомеля, піша «Онлайнер». У роліку ёсць маладая настаўніца, чыйсьці грозны голас, плакат з гербам і гімнам, а таксама радасныя дзеці. Няма толькі дошкі. З рэплік жанчыны, якая трымае камеру, вынікае, што дошку забрала дырэктарка, таму што бацькі не заплацілі. Журналісты паспрабавалі зразумець, што адбываецца.

Ананімнае відэа размясціла супольнасць «Мая краіна Беларусь». Настаўніца кажа нешта пра тое, што «дошку папрасілі на час у іншую школу». Жанчына з камерай удакладняе: гэта зроблена ў пакаранне, таму што бацькі не купілі новую дошку.

Відэа знята ўчора ўвечары.

Каб спытаць, што адбываецца, журналісты звязаліся з дырэктарам школы Нінай Клязовіч. Яна ў жаху, кажа, у класе з раніцы ўжо пабывала дэлегацыя з арганізацый кантролю, цяпер вось сама накіроўваецца ва ўпраўленне адукацыі - усё праз гэту гісторыю з дошкай.

- Мы знялі яе ўчора ў 2 гадзіны дня, а сёння а 9 дошка ўжо вісела на месцы! - кажа дырэктарка. - Камісія прыйшла, пераканалася, што дзеці сядзяць, вучацца...

- А навошта здымалі-то?

- Справа ў тым, што ў яе мацаванне было пашкоджанае. Зрабілі, пафарбавалі мацаванне, дачакаліся, пакуль фарба высахне, павесілі на месца, вось і ўсё. Якое пакаранне, якія грошы - пра што вы кажаце?! Я не ведаю, хто вылівае гэты бруд, я 39 гадоў у адукацыі, а тут зацкавалі, проста зацкавалі...