Заіка: Празмернасць кадраў сёння толькі ў адміністрацыі Лукашэнкі і ўрадзе
12- 13.12.2019, 18:31
- 16,592
Праблема з кадрамі ва ўсіх сферах будзе толькі пагаршацца.
Эканаміст Леанід Заіка патлумачыў «Радыё Рацыя», чаму ў краіне дэфіцыт медыцынскіх работнікаў.
У Беларусі не стае 6 тысяч лекараў і медсясцёр. Такая колькасць вакансій афіцыйна зарэгістравана ў агульнанацыянальным банку вакансій.
- Кадравая праблема для медыкаў заўсёды была вострай. Празмернасць кадраў сёння ў краіне ў адміністрацыі Лукашэнкі і ва ўрадзе. Але ніхто гэта чамусьці не абмяркоўвае, - кажа Заіка.
Мяркую, што ўсё гэта звязана з агульным станам медыцыны ў Беларусі. Праца складаная, праблемы сістэмныя. У некаторых бальніцах месцаў для пацыентаў не стае, паглядзіце, якія чэргі ў паліклініках. Усё гэта выдаткі бясплатнай медыцыны. Хочаце лячыцца з камфортам - плаціце. У многіх краінах, дарэчы, платная і страхавая медыцына.
А наогул, у нашай краіне адсутнічае такое патрабаванне да чалавека, каб ён быў здаровым. За мяжой наймальнік перш за ўсё глядзіць на стан здароўя работніка і ніколі не аддасць перавагу таму, хто паліць і ўжывае алкаголь. Сучасны замежны работнік - чалавек, які вядзе здаровы лад жыцця. А вы паглядзіце, што ў нас у паліклініках робіцца, колькі маладых людзей ужо хворыя. Не кожны лекар вытрымае, нагрузка вельмі вялікая.
- У Польшчы зрабілі льготы для беларускіх медыкаў, каб прыцягнуць іх прыязджаць на працу. Значыць, кадравая праблема ў Беларусі будзе яшчэ большай?
- Як гаворыцца, рыба шукае дзе глыбей, а чалавек, дзе лепш. Таму, калі ёсць прывабная прапанова, хтосьці на яе і адгукнецца. Але ж гэта не толькі ў медыцынскай галіне. З'язджаюць на працу добрыя будаўнікі, айцішнікі...
Міграцыя работнікаў - гэта нармальная з'ява. Зрабіце лепшыя ўмовы дома - і ніхто нікуды не паедзе.