Названы меркаваны арганізатар у справе Паўла Шарамета

Адвакат апублікаваў тэкст падазрэння.

Адвакат Юліі Кузьменкі, падазраванай у забойстве журналіста Паўла Шарамета, Улад Добаш у сваім Facebook апублікаваў тэкст падазрэння, у якім пазначана, што музыка і добраахвотнік Андрэй Антоненка з'яўляецца арганізатарам забойства Шарамета, паведамляе gordonua.com.

"Дасудовым расследаваннем ўстаноўлена, што Антоненка Андрэй Сяргеевіч, 2 кастрычніка 1971 года нараджэння, захапіўшыся ультранацыяналістычна ідэямі, культывуючы веліч арыйскай расы, падзелу грамадства паводле прынцыпу нацыянальнай прыналежнасці, імкнучыся зрабіць свае погляды прадметам увагі грамадскасці... знаходзячыся на тэрыторыі правядзення АТА, з ліку валанцёраў і асоб, якія прайшлі вайсковую падрыхтоўку ў складзе добраахвотніцкіх батальёнаў і маюць навыкі абыходжання з агнястрэльнай зброяй і выбуханебяспечнымі рэчывамі, надумаў стварыць арганізацыйную групу, каб у яе складзе ўчыніць забойства журналіста і радыёвядоўцы Паўла Шарамета", - гаворыцца ў тэксце падазрэння Нацпаліцыі.

Такім чынам, паводле версіі следства, Антоненка выйшаў на медыка Юлію Кузьменку, валанцёра Яну Дугара і яшчэ шэраг асоб, якія мелі падобныя з ім погляды.

"Антоненка ўзяў на сябе функцыі арганізатара і кіраўніка групоўкі", - сказана ў паведамленні.

Следчыя падкрэсліваюць, што ў кожнага чальца групоўкі былі свае абавязкі.

12 снежня міністр унутраных спраў Украіны Арсен Авакаў паведаміў пра затрыманне падазраваных у датычнасці да забойства Шарамета. На тэрміновым брыфінгу намеснік кіраўніка Нацпаліцыі Яўген Каваль назваў імёны магчымых датычных да забойства: медсястра аднаго з парашутна-дэсантных батальёнаў Яна Дугар, музыка і добраахвотнік Андрэй Антоненка, хірург шпіталя "Ахматдэт" і валанцёрка Юлія Кузьменка і сям'я удзельнікаў АТА - Уладзіслаў і Іна Грышчанкі.

Паводле ягоных слоў, выбухоўку ў аўтамабіль закладвалі Кузьменка і Антоненка.

Паліцэйскі адзначыў, што за час АТА Кузьменка набыла дом і два аўтамабілі. У ноч на 13 снежня яе затрымалі.

Шарамет загінуў 20 ліпеня 2016 года ў Кіеве ў выніку падрыву аўто, якое належала сузаснавальніцы выдання "Украінская праўда", грамадзянскай жонцы журналіста Алене Прытуле. Пракуратура кваліфікавала інцыдэнт як наўмыснае забойства, учыненае спосабам, небяспечным для жыцця многіх людзей.

Следства разглядала чатыры версіі матываў забойства Шарамета: прафесійную дзейнасць, асабістае непрыязнае стаўленне, дэстабілізацыю сітуацыі ва Украіне, забойства з памылкі (замест Прытулы). У лютым 2017 года прыярытэтнай версіяй праваахоўнікаў была журналісцкая дзейнасць Шарамета. Цяпер асноўнай версіяй забойства паліцыя разглядае дэстабілізацыю сітуацыі ва Украіне. Генеральны пракурор Руслан Рабашапка падкрэсліў, што следства яшчэ не знайшло заказчыкаў забойства.

9 снежня Грышчанка на судзе заяўляў, што яму нібыта прапаноўвалі ўзяць на сябе адказнасць за забойства Шарамета або супрацоўніка Галоўнай управы выведкі Міністэрства абароны Украіны Максіма Шапавала, а таксама за ўзарваныя ў кастрычніку 2015 года электраапоры ў Херсонскай вобласці. 10 снежня "Украінская праўда" паведаміла, што з Адзінага рэестра судовых пастаноў знікла некалькі пастаноў паводле справы Уладзіслава Грышчанкі, які разам з жонкай Інай знаходзіцца пад арыштам паводле справы аб падрыхтоўцы выбуху ў Івана-Франкоўскай вобласці.

На брыфінгу сярод фігурантаў справы згадваўся ветэран АІА Іван Вакуленка. 7-га лістапада выданне INSIDER пісала, што ён атрымаў 16 кастрычніка позву на прызначаны на 21 кастрычнiка допыт паводле справы Шарамета, а 18 кастрычніка сястра ветэрана знайшла ягонае цела з ранай галавы. Са звестак выдання, абставіны смерці Вакуленкі могуць сведчыць пра спробу "павесіць" на яго забойства Шарамета.