«Лукашэнка і ягоныя дзеці ў народных лякарнях не лечацца»

Беларусы абмяркоўваюць навіну пра дэфіцыт медыкаў у краіне.

У сеціве абмяркоўваюць дэфіцыт медыкаў у краіне. Усяго ў Беларусі не хапае амаль 6 тысячаў лекараў і медсясцёр, паведамляе «Салідарнасць».

Такая колькасць вакансій зарэгістраваная ў агульнанацыянальным банку вакансій.

«Вось лімфолага ў краіне ўвогуле няма ніводнага, – піша ўдзельнік дыскусій у сеціве. – І як прэзідэнт збіраецца развязаць гэтую праблему? Выпіша з-за мяжы на 500 рублёў заробку? Жэстачайша перакваліфікуе ўказам з ЛОРаў або ўролагаў, напрыклад? Сам раскажа і пакажа, як трэба? Але гэта ж не біятлон і не бахча... За што нам усё гэта?»

Беларусы ўспамінаюць Лукашэнку пра тое, што яго не напружвае маштабны адток медыкаў з краіны.

«Ну, а чаго яго гэта павінна напружваць, ён і ягоныя дзеці ў “народных лякарнях” не лечацца», – заўважыў адзін з удзельнікаў дыскусіі.

«Галоўнае, каб хапала міліцыянтаў, а лекараў у паліклініцы для “дэпутатаў” у Ждановічах хапае, яшчэ і чарга стаіць – на працу ўладкавацца хочуць».

Людзі звяртаюць увагу на недахоп ложка-месцаў у лякарнях.

«З пяці залётаў у лякарню тройчы перш на калідоры некалькі дзён тут валяўся, і гэта Менск».

«Калі б замест 17 рэзідэнцый у краіне пабудавалі 17 лякарняў, то пытанне з бальнічнымі месцамі, было б даўно ўжо развязанае».

Некаторыя мяркуюць, што недахоп медыкаў выгодны дзяржаве: «Менш на пенсіі грамадзянін пражыве. А калі падняць пенсійны ўзрост да 70, то ўвогуле лепата».

Галоўная прычына дэфіцыту лекараў, на думку ўдзельнікаў дыскусіі, – малыя заробкі.

«У мяне суседка – педыятр, вузкі спецыяліст у СКТ. Ёй ужо даўно за 70, але прадаўжае працаваць, абслугоўваючы тры ўчасткі... Не адпускаюць, бо, з яе словаў, на такі заробак (пачатковы 160 бінаў) маладых вузкіх спецыялістаў не прывабіць. І гэта ў Бабруйску, дзе нібыта менш за ўсё патрэба ў лекарах / медыцынскіх сёстрах».

«Прыйшоў уладкоўвацца на працу. Пытаюся, які заробак. Адказваюць: 620 рублёў. Ок. Падпісваю кантракт. Вынік: аклад 180 рублёў, астатняе – прэмія. І высвятляецца, ва ўсіх так. Вынік: сярэдні заробак у гаспадарцы складае 180 рублёў. Бо прэмію зарабіць трэба, а яна залежыць ад паказнікаў арганізацыі, а не ад маёй праведзенай працы».

Іншыя мяркуюць, што справа не толькі ў нізкім заробку, але і ў стаўленні да лекара: «Медыцына ў нас стала на ўзровень ЖЭСа і крамы. Лекар усім павінен і абавязаны і пры гэтым усе гатовыя напісаць на яго скаргу. Лекар больш бегае па соплях і тэмпературы на ўчастку, каб бальнічныя раздаць, а не займаецца лячэннем».