Партыя Мэркель адхіліла агульнае галасаванне наконт кандыдатуры канцлера

За змяненне працэдуры раней выказалася моладзевае крыло ХДУ.

Хрысціянска-дэмакратычная унія (ХДУ) адхіліла ініцыятыву ўвесці агульнае галасаванне ўсіх сябраў партыі наконт кандыдатуры на пасаду федэральнага канцлера. Пасля доўгіх дэбатаў на з'ездзе хрысціянскіх дэмакратаў у суботу, 23 лістапада, у Лейпцыгу пераважная большасць дэлегатаў выказаліся супраць адпаведных прапаноў, перадае DW.

Генеральны сакратар ХДУ Паўль Ціміяк (Paul Ziemiak) рэкамендаваў адхіліць хадайніцтва аб змене працэдуры абрання кандыдата на пасаду федэральнага канцлера.

Моладзевае крыло выказалася за змяненне працэдуры

Сярод тых, хто выступаў за агульнае галасаванне, была моладзевая арганізацыя кансерватараў Junge Union. Яе лідар Тыльман Кубан (Tilman Kuban) перад галасаваннем заклікаў дапусціць да працэдуры абрання кандыдатуры на пасаду канцлера ўсіх чальцоў партыі. Сучаснай партыі патрэбны падобны ўдзел яе сябраў у прыняцці важных пастаноў, падкрэсліў ён. У такі ключы выказаліся шэраг іншых прыхільнікаў змены працэдуры.

Як адзначае AFP, такія патрабаванні лічацца выступам супраць лідаркі хрысціянскіх дэмакратаў і міністра абароны ФРГ Анегрет Крамп-Карэнбауэр (Annegret Kramp-Karrenbauer), якая ў снежні 2018 года была абраная старшынёй партыі і змяніла на гэтай пасадзе Ангелу Мэркель (Angela Merkel). Паводле традыцыі, якая склалася ў ХДУ, кіраўнік партыі становіцца яе кандыдатам на пасаду канцлера на чарговых парламенцкіх выбарах.