Amnesty International: Бізнэс-мадэлі Google і Facebook пагражаюць правам чалавека

Хоць Facebook і Google не спаганяюць плату, карыстальнікі плацяць за іх паслугі асабістымі звесткамі.

Назіранне за мільярдамі інтэрнэт-карыстальнікаў з боку Facebook і Google стварае беспрэцэдэнтную пагрозу правам чалавека. Пра гэта гаворыцца ў дакладзе "Гіганты сачэння" праваабарончай арганізацыі Amnesty International, піша gordonua.com.

На думку Amnesty, бізнэс-мадэль Facebook і Google паводле сваёй сутнасці не адпавядае праву на прыватнасць і стварае сістэматычную пагрозу шэрагу правоў чалавека, у тым ліку права на свабоду меркаванняў і іх выказвання і права на роўнасць і адсутнасць дыскрымінацыі.

Праваабаронцы заявілі, што, хоць Facebook і Google не спаганяюць плату, карыстальнікі плацяць за іх паслугі асабістымі звесткамі. Адзначаецца, што такія звесткі могуць быць выкарыстаныя супраць карыстальнікаў.

"Google і Facebook дамінуюць у нашых сучасных жыццях, назапашваючы беспрэцэдэнтную ўладу над лічбавым светам шляхам збору і манетызацыі персанальных звестак мільярдаў людзей. Іх схаваны кантроль над нашымі лічбавымі жыццямі падрывае саму сутнасць прыватнасці і кідае выклікі для правоў чалавека ў нашу эру", - сказаў генеральны сакратар Amnesty International Кумі Найду.

У арганізацыі нагадалі пра скандал вакол кампаніі Cambridge Analytica, "які паказаў, наколькі лёгка інфармацыю пра чалавека могуць выкарыстоўваць не паводле прызначэння непрадказальным шляхам з мэтай маніпуляцыі ім і ўплыву".

Amnesty заклікае заканадаўцаў прыняць новыя законы аб прыватнасці звестак і забяспечыць выкананне цяпер дзейных.

У сакавіку 2018 году газэта The New York Times паведаміла, што Cambridge Analytica ў 2016 годзе сабрала асабістыя звесткі 50 млн карыстальнікаў Facebook. Галоўны тэхнічны дырэктар Facebook Майк Шрэпфар сцвярджаў, што даступнымі сталі звесткі 87 млн чалавек.

Cambridge Analytica спрабавала мадэляваць перавагі карыстальнікаў сацсетак, паказваючы ім рэлевантную палітычную рэкламу.

У пачатку траўня 2018 года кампанія Cambridge Analytica абвясціла аб пачатку працэдуры банкруцтва, заявіўшы, што страціла ўсіх кліентаў праз "неабгрунтаваныя абвінавачванні" ў СМІ.

Праз парушэнне прыватнасці вестак карыстальнікаў у кастрычніку 2018 года ўлады Вялікабрытаніі аштрафавалі Facebook на £ 500 тысяч, у ліпені 2019 года Федэральная гандлёвая камісія ЗША наклала на кампанію штраф сумай $5 млрд.