Рэха «дражджавой вайны» Лукашэнкі

Уладам зноў трэба мяняць Генплан Менска?

Пасля нядаўняй нарады ў Лукашэнкі ўлады пастанавілі пакуль не выносіць Менскі дражджавы камбінат на вуліцы Кастрычніцкай за межы сталіцы, паведамілі tut.by інфармаваныя крыніцы. Усё б нічога, калі б гэтае прадпрыемства ўжо амаль 10 гадоў не было вызначанае пад вынас пастановай Савета міністраў і генпланам Менска 2016 года. Чаму так адбылося і што з гэтым цяпер рабіць – у матэрыяле.

Менскі дражджавы камбінат знаходзіцца насупраць «Крышталя» – на вуліцы Кастрычніцкай у цэнтры сталіцы. Прадпрыемства пабудаванае яшчэ ў часы польскай акупацыі пачатку 20-х гадоў мінулага стагоддзя, а ў 2010-я паўстала пытанне пра ягоны вынас за межы Менска.

Сярод іншага, тады была прынятая пастанова пра мадэрнізацыю Слуцкага дражджавога камбіната пры ўдзеле нямецкай кампаніі Uniferm. Гаворка ішла пра стварэнне завода, прызначанага для поўнага пакрыцця ўнутранай патрэбы ў дражджах і вялікіх аб'ёмаў экспарту. Улады запэўнівалі, што пасля пачатку працы прадпрыемства ў Слуцку плануецца зачыніць працоўны ў цэнтры Менска дражджавы камбінат.

У выніку ў пастанове Савета міністраў 2010 года быў прапісаны вынас Менскага дражджавога камбіната за горад да 2015 года. У тым жа 2015 годзе быў распрацаваны ПДП, згодна з якім на месцы дражджавога на Кастрычніцкай у перспектыве павінен з'явіцца музейна-асветніцкі комплекс. Гэта ўсё легла ў аснову зацверджанага Лукашэнкам Генплана Менска 2016 года, якім захаванне дражджавога таксама не прадугледжвалася.

Адзначым, што разам з дражджавым камбінатам у саўмінаўскім спісе на вынас было яшчэ 17 менскіх прадпрыемстваў, але 12 з іх да гэтага часу на сваіх месцах. У сувязі з гэтым у канцы мінулага года Лукашэнка зладзіў разнос мясцовым уладам за правал праграмы вынасу прадпрыемстваў за горад.

Але на мінулым тыдні пытанне вынасу Менскага дражджавога камбіната прагучала па-іншаму. Як паведамляла прэс-служба Лукашэнкі, перад нарадай інвестдамову з нямецкім Uniferm прааналізавалі ў АП і прыйшлі да высновы, што ў ёй не ўтрымліваюцца ўмовы вынасу дражджавога камбіната з Менска.

Як паведамляюць tut.by знаёмыя з ходам нарады крыніцы, паводле яе вынікаў было дадзенае даручэнне не чапаць Менскі дражджавы.

І што цяпер з гэтым рабіць?

Паводле агульнага правіла, пасля атрымання пратакола даручэнняў паводле вынікаў нарады, Менгарвыканкам павінен падрыхтаваць праект указа Лукашэнкі пра ўнясенне змяненняў у Генплан сталіцы. Потым гэты ўказ трэба падпісаць у Лукашэнкі і на яго падставе ўнесці змены ў ПДП.

Акрамя таго, Савету міністраў трэба будзе выключыць дражджавы камбінат са спісу прадпрыемстваў, якія падпадаюць пад вынас.

Але, мяркуючы з усяго, раскладка можа быць крыху іншай. Так, у наступным годзе будзе чарговае карэктаванне Генплана Менска, пры падрыхтоўцы якога возьмуць да ўвагі даручэнне не чапаць дражджавы.

Вядома, тэарэтычна можна і нічога не мяняць, але тады не будзе ніякіх гарантый захавання камбіната, а таксама магчымасці ягонай нармальнай мадэрнізацыі.

А чаму ўсё ж пастанавілі не чапаць дражджавы?

Як вынікае з паведамлення прэс-службы Луашенкі, па-першае, у інвестдамове патрабавання зачыніць дражджавы няма. Па-другое, усе ўдзельнікі нарады пагадзіліся, што сёння дражджавы камбінат у Менску – добрая вытворчасць, здольная ствараць канкурэнцыю сучаснаму заводу ў Слуцку яшчэ не адзін год. Па-трэцяе, Лукашэнка сказаў, што ўзяць і зачыніць камбінат не выйсце, тым больш што гэта ідзе насуперак з сацыяльна арыентаванай палітыкай у краіне.

Як паведаміў віцэ-прэм'ер Уладзімір Дворнік, колькасць супрацоўнікаў на дражджавым камбінаце ў Менску 150 чалавек, сярэдні заробак тут амаль 850 рублёў.

Але, адзначым, што не апошнім тут мог быць і ўнутрынаменклатурны ўплыў. Рэч у тым, што цяпер Менскім дражджавым камбінатам кіруе экс-памочнік былога кіраўніка адміністрацыі Лукашэнкі Аляксандра Касінца Аляксандр Белы. Цяпер жа Косінец – памочнік Лукашэнкі, які курыруе стратэгічныя праекты. Ён быў на нарадзе пра дражджавую галіну.