Работнікі «дочкі» «Гродна Азота» ўзбунтаваліся

140 чалавек запатрабавалі павелічэння прэмій.

Работнікі гарадзенскага «АзотСпецТранса» - даччынага прадпрыемства «Гродна Азота» - напісалі адкрыты ліст гендырэктару галаўнога прадпрыемства. Людзі скардзяцца на маленькую у параўнанні з іншымі падраздзяленнямі прэмію паводле вынікаў мінулага года. Работнікі таксама просяць гендырэктара, каб «АзотСпецТранс» вярнулі ў структурнае падраздзяленне вялікага завода. Зварот да кіраўніка «Гродна Азота» Ігара Бабыра падпісалі 140 чалавек, паведамляе tut.by.

«АзотСпецТранс» быў створаны ў снежні 2013 года на базе аўтатранспартнага цэха, чыгуначнага цэха, станцыі тэхнічнага абслугоўвання і рамонту легкавых аўтамабіляў і ўчастка па добраўпарадкаванні ААТ «Гродна Азот», а таксама транспартнага цэха ПТК «Хімвалакно» - і стала асобнай вытворчай адзінкай. На прадпрыемстве цяпер - 500 работнікаў розных прафесій і рухомы састаў у 210 адзінак аўтатранспарту.

«АзотСпецТранс» займаецца транспартнымі паслугамі. У прадпрыемства ёсць свая СТА, а таксама ўчастак рамонта і абслугоўвання транспарту, аддзяленне рамонту паліўнай апаратуры, аддзяленне рамонту электраабсталявання, зварачнае аддзяленне, шынамантаж, такарна-механічнае аддзяленне, а таксама ўніверсальная мыйка аўтамабіляў.

- Шэсць гадоў, што існуе наша прадпрыемства, мы трываем матэрыяльныя і маральныя прыніжэнні. Мы хочам разабрацца ў сітуацыі, якая склалася пры атрыманні прэміі паводле вынікаў працы за 2018 год, - распавядаюць працаўнікі. - Усе работнікі «Азота» і іншых унітарных прадпрыемстваў атрымалі выплаты ў поўным аб'ёме. Прэмія там была ад 200 да 1200 рублёў. У нас жа рабочыя атрымалі ад 50 да 200 рублёў. Чаму так атрымалася, кіраўніцтва нашага прадпрыемства нам тлумачыць адмаўляецца. Таму мы сабралі подпісы і накіравалі зварот генеральнаму дырэктару ААТ «Гродна Азот», каб той разабраўся ў сітуацыі, якая склалася.

Таксама рабочыя просяць вярнуць іх транспартнае прадпрыемства ў структуру «Гродна Азота» - як было раней.

Кіраўніцтва «АзотСпецТранса» тлумачыць, што выплата прэміі ўсім работнікам залежыць ад прыбытку, якое атрымала прадпрыемства за справаздачны перыяд. Калі рэнтабельнасць невялікая, то прэміі можа і не быць наогул.

- Фінансавыя магчымасці прадпрыемства на выплату ўзнагароджання абмяжоўваюцца пэўнай сумай - 166 тысяч рублёў, - распавядаюць у «АзотСпецТрансе». - Пры гэтым сярэднямесячны заробак за 9 месяцаў гэтага года ў нас - амаль 1305 рублёў.

На прадпрыемстве «АзотСпецТранс» прайшоў агульны сход супрацоўнікаў, аднак сітуацыя пакуль не змянілася: людзі патрабуюць сустрэчы з галаўным кіраўніцтвам.

Зварот да гендырэктара ААТ «Гродна Азот» цяпер знаходзіцца на разглядзе кіраўніцтва прадпрыемства.