У цэнтры Менска пачалі будаваць велізарную амбасаду Кітая

Будынак будзе вельмі вялікіх памераў.

У цэнтры Менска пачалася вялікая будоўля. Неўзабаве каля Палаца незалежнасці з'явіцца амбасада Кітая - калі паверыць рэндарам, якія так часта расчароўваюць, калі працы закончацца, будынак будзе вельмі вялікіх памераў. Паводле інфармацыі tut.by расказваем, якім павінна атрымацца амбасада, мяркуючы з абяцанняў.

Па-першае, у цэнтры Менска стане яшчэ шчыльней

Той раён, дзе ўзводзяць пасольства, у апошні час шчыльна забудоўваецца. Напрыклад, тут апынуўся будынак Вярхоўнага суда (беларусы абураліся яго пампезнасцю і дарагоўляй), тут жа нядаўна адкрыўся гандлёвы цэнтр «Палаца». Паводле планаў, у гэтым месцы пабудуюць яшчэ дзве амбасады: ААЭ, і з асабістай прапановы прэзідэнта - пасольства Узбекістана.

Наогул, пра «зямельны бартар» абедзве краіны дамаўляліся яшчэ ў 2010 годзе. У выніку Беларусі аддалі ў арэнду ўчастак у Пекіне плошчай пад 0,5 гектара, а кітайскаму боку - у тры разы больш: тэрыторыю на 1,5 гектара ў Менску.

Што вядома аб новым пасольстве Кітая ў Менску

Не адзін будынак, а цэлы комплекс будуюць паміж гандлёвым цэнтрам «Замак» і пасольствамі Казахстана і Туркменістана. У мінулым годзе Кітай атрымаў гэтую зямлю ў арэнду аж на 70 гадоў наперад, да 2088 года. Прычым плаціць за яе давядзецца па даляры (!) за год.

Акрамя самой амбасады, у комплексе размесцяць кватэры для супрацоўнікаў і дапаможныя пабудовы. Іншых звестак пакуль нідзе не даведацца: пашпарт аб'екта яшчэ не паказалі. Але крыніцы кажуць, што будоўля скончыцца прыкладна праз тры гады. Гэта значыць, што запуск амбасады варта чакаць не раней за 2022 год.