У справе аб імпічменце Трампа з'явіліся яшчэ два сведкі

Яны далі паказанні ў Палаце прадстаўнікоў Кангрэсу ЗША.

Яшчэ два сведкі, якія чулі тэлефонную размову прэзідэнта ЗША Дональда Трампа і прэзідэнта Украіны Уладзіміра Зяленскага, праз якую над амерыканскім лідарам навісла пагроза імпічменту, далі паказанні перад камітэтам Палаты прадстаўнікоў па выведцы. Як паведамляе ў ноч на нядзелю, 17 лістапада, інфармагенцтва dpa, гаворка ідзе пра былога супрацоўніка Рады нацыянальнай бяспекі ЗША Ціма Морысана і супрацоўніцу віцэ-прэзідэнта ЗША Майка Пенса Джэніфер Уільямс, паведамляе dw.com.

Увечары ў суботу былі апублікаваныя расшыфроўкі паказанняў Морысана і Уільямс у скарочаным выглядзе. Мяркуючы па гэтых дакументах, Уільямс назвала звернутую да Зяленскага просьбу Трампа правесці антыкарупцыйнае расследаванне ў дачыненні да яго верагоднага спаборніка на прэзідэнцкіх выбарах 2020 года, Джо Байдэна, і яго сына Хантэра «незвычайнай» і «недарэчнай». «У маіх вачах гэта (патрабаванне. - Рэд.) указвала на магчымую наяўнасць іншых матываў для затрымання вайсковай дапамогі», - заявіла Уільямс. З яе слоў, сітуацыя выглядала так, як быццам гаворка ішла ў большай ступені пра «асабісты палітычны парадак дня» прэзідэнта, чым пра знешнепалітычныя інтарэсы ЗША.

Крытыкі Трампа мяркуюць, што ён скарыстаўся сваім становішчам, каб зрабіць ціск на Зяленскага, пагражаючы прыпыніць фінансавую дапамогу Украіне, калі кіеўскія ўлады не абвесцяць аб правядзенні расследавання супраць яго палітычнага праціўніка.

Са свайго боку, Цім Морысан пацвердзіў, што частковае прыпыненне выплаты дапамогі Украіне было звязанае з патрабаваннем аб'явіць аб намеры правесці расследаванне ў дачыненні да сям'і Байдэнаў і кампаніі Burisma. Пры гэтым Морысан паказаў, што ён не заўважыў у размове Трампа з Зяленскім, якая адбылася 25 ліпеня, нічога незаконнага.