Кіраўнік МЗС Украіны: «Нармандскі саміт» у лістападзе - апошні шанец «Менска»
2- 14.10.2019, 18:18
- 10,927
Са слоў Вадзіма Прыстайкі, калі ён не спрацуе, Украіне давядзецца шукаць план Б.
Лідары Украіны, Расеі, Францыі і Нямеччыны могуць правесці саміт у Парыжы ў сярэдзіне лістапада, калі Кіеў і прарасейскія сепаратысты на ўсходзе Украіны змогуць падтрымліваць спыненне агню.
Як паведамляе «Европейская правда», пра гэта 14 кастрычніка ў інтэрв'ю Reuters заявіў міністр замежных спраў Украіны Вадзім Прыстайка.
У размовах перад сустрэчай з міністрамі замежных спраў ЕЗ у Люксембургу, Прыстайка сказаў, што саміт можа рушыць услед пасля сямідзённага спынення агню і адводу лёгкай зброі.
«У нас ёсць некаторыя даты... мы імкнёмся да сярэдзіны наступнага месяца, дзесьці каля сярэдзіны лістапада», - сказаў ён.
«Мы адкрыта сказалі ўсім, што робім, магчыма, апошнюю сумленную спробу ісці менскім шляхам», - заявіў кіраўнік МЗС.
«Калі гэта не спрацуе, нам давядзецца шукаць нейкі план Б», - дадаў Прыстайка, адмовіўшыся гаварыць, што гэта можа быць за план.
Раней Прыстайка паведаміў, што дарадцы лідараў Украіны, Нямеччыны, Францыі і Расеі ўжо ўзгаднілі выніковы дакумент «нармандскай сустрэчы».