Журналісты злавілі Міністэрства аховы здароўя на хлусні
9- 14.10.2019, 16:21
- 20,863
Фактчэкінг выявіў недапасаванне ў лічбах.
У інтэрв'ю тэлеканалу «Беларусь 1» галоўная спецыялістка Міністэрства аховы здароўя Юлія Савачкіна заявіла, што за апошнія дзесяць гадоў колькасць спаронаў у нашай краіне зменшылася ў 6,5 разы. Але статыстыка не пацвярджае гэтую інфармацыю, паведамляе «Еўрарадыё».
Станоўчую тэндэнцыю спецыялісты звязваюць з увядзеннем Міністэрствам аховы здароўя абавязковага перадабортнага кансультавання з псіхолагам. Гэтую паслугу надае медустанова (незалежна ад формы ўласнасці) бясплатна. У 15-20 адсотках выпадкаў пасля кансультацыі жанчыны захоўваюць цяжарнасць, сказалі падчас тэлеэфіру.
Як ідуць справы насамрэч
Недапасаванне ў ліках заўважылі незалежныя журналісты. Паводле афіцыйных звестак Белстата, у 2008 годзе ў Беларусі зрабілі 42,2 тысячы спаронаў, у 2009-м - 36 тысяч, а актуальная статыстыка - 23,3 тысячы спаронаў за 2018 год.
Калі ж казаць пра іншы паказчык - колькасць перапыненых цяжарнасцяў на тысячу жанчын ва ўзросце ад 15 да 49 гадоў - то ў 2008 годзе ён складаў 16,7, а ў 2009 годзе - 14,4. Па статыстыцы на 2018 год гэты паказчык роўны 10,5.
Усё гэта значыць, што спаронаў у Беларусі напраўду становіцца менш. Але, на падлікі Белстата, відавочна не «ў 6,5 разы за апошнія дзесяць гадоў», а амаль у 1,8 разы ў першым паказчыку, і ў 1,6 разы - у другім.