У Беларусь з РФ прарываліся фуры з дзясяткамі тон нелегальных кавуноў і пшаніцы

Пра інцыдэнт распавяла Гомельская мытня.

Гомельскія мытнікі каля мяжы з Расеяй затрымалі тры аўтамабілі. Яны спрабавалі завезці ў Беларусь незаконным чынам 22 тоны кавуноў і 32 тоны пшаніцы, паведамляюць belnovosti.by.

Як распавялі ў Дзяржаўным мытным камітэце, праверка выявіла незаконнасць грузу праз адсутнасць фітасанітарных сертыфікатаў, якія пацвярджаюць бяспеку прадуктаў.

Паводле інфармацыі мытнікаў, сукупны кошт нелегальнага тавару перавысіў 12 500 беларускіх рублёў.

Па факце правапарушэння Гомельская мытня пачала адміністрацыйныя працэсы (частка 4 артыкула 12.17 Кодэкса Беларусі аб адміністрацыйных правапарушэннях).

Згодна з гэтым артыкулам, юрыдычная асоба можа быць пакараная штрафам на суму да 50% ад кошту нелегальнага грузу.