Жыхары Сахаліна: Улады перашкаджаюць праводзіць акцыі супраць перадачы Курыл

На выспе актывісты праводзяць народныя сходы.

У суботу ў Сахалінскай вобласці жыхары адразу некалькіх гарадоў і пасёлкаў выйшлі на акцыі пратэсту супраць перадачы Курыльскіх выспаў Японіі. Дзесьці, са слоў арганізатараў, прайшлі адзіночныя пікеты, а дзесьці людзі выйшлі на народныя сходы. Паводле іх падлікаў, усяго ў акцыях узяла ўдзел больш за 200 чалавек.

Каардынатар руху «Грамадзянская пазіцыя» Станіслаў Кузняцоў паведаміў карэспандэнту «Сибирь.Реалии», што ўдзельнікі акцыі таксама выступалі за вяртанне прамых выбараў і супраць аб'яднання Сахаліна з Прымор'ем. Пры гэтым мясцовыя ўлады ва ўсіх выпадках адмовіліся ўзгадніць правядзення мерапрыемстваў. Інфармацыі аб затрыманні пратэстоўцаў няма.

«Людзям спрабавалі перашкодзіць як маглі. Дзесьці на плошчах адразу пачалі чысціць снег, проста не даючы жыхарам паставіць подпісы пад агульнай рэзалюцыяй з нашымі патрабаваннямі. Хоць агулам, я мяркую, што ўсё прайшло добра. Мы працягнем збіраць меркаванні жыхароў рэгіёну ў гэтых пытаннях», - заявіў рэдакцыі Кузняцоў.

У Маскву прыбывае кіраўнік МЗС Японіі для перамоў аб Курылах

Ён таксама паведаміў, што 19 студзеня падобны народны сход павінен прайсці ў сталіцы рэгіёну Паўднёва-Сахалінску. Там улады таксама не дазволілі праводзіць акцыю.

Прыхільнікі пратэсту ў сваёй рэзалюцыі запатрабавалі выключыць з парадку перамоў з Японіяй укладанне мірнай дамовы, як падставы для тэрытарыяльных саступак і спынення прапаганды аб неабходнасці такой дамовы, бо пасля безумоўнай капітуляцыі Японіі 2 верасня 1945 года ў гэтым пытанні фактычна пастаўленая кропка. Было таксама прапанавана адрадзіць святкаванне Дня Перамогі над Японіяй, што не адзначаецца з 1947 года. Акрамя падпісанты выступаюць супраць магчымага аб'яднання Сахалінскай вобласці з Прыморскім краем.

Японія не прызнае расейскую прыналежнасць астравоў Ітуруп, Шыкатан, Кунашыр і Хабамаі. Яны былі акупаваны СССР у канцы Другой сусветнай вайны. Праз спрэчкі аб прыналежнасці выспаў Расея і Японія дагэтуль не падпісалі мірную дамову. У лістападзе пасля сустрэчы Абэ з прэзідэнтам Расеі Уладзімірам Пуціным стала вядома, што Японія гатовая вярнуцца да дэкларацыі аб астравах 1956 году. У ёй СССР згаджаўся перадаць Японіі выспы Хабамаі і Шыкатан пасля падпісання мірнай дамовы паміж дзвюма краінамі.

Пазіцыя Масквы заключаецца ў тым, што выспы ўвайшлі ў склад СССР паводле вынікаў Другой сусветнай вайны і суверэнітэт Расеі над імі сумневу не падлягае. Аднак пасля сустрэчы з Пуціным Абэ заявіў, што Расея гатовая паскорыць перамоўны працэс аб мірнай дамове на аснове савецкай дэкларацыі. Сам Пуцін у верасні прапаноўваў падпісаць мірную дамову без папярэдніх умоў. Абэ такую прапанову назваў непрымальнай.

Прэс-сакратар Пуціна Дзмітрый Пяскоў заяўляў, што мірная дамова паміж дзвюма краінамі не азначае перадачу выспаў Японіі. Калумніст агенцтва Bloomberg адзначаў, што Масква можа спрабаваць захаваць суверэнітэт над Курыльскімі выспамі ў тым ці іншым выглядзе. Паводле апытання «Левада-цэнтра», толькі 17 адсоткаў расейцаў гатовыя падтрымаць перадачу часткі Курылаў Японіі.