Нацбанк заблукаў у віртуальнай рэальнасці

Нацыянальны банк Беларусі лічыць, што існуючы афіцыйны абменны курс беларускага рубля адпавядае бягучым эканамічным умовам.

«Новае цэнтральнае значэнне рублёвага кошту кошыка (долар ЗША, еўра і расейскі рубель) адпавядае бягучым эканамічным умовам і з'яўляецца элементам макраэканамічнай карэкціроўкі, якая рэалізуецца ўрадам і Нацыянальным банкам, накіраванай на выраўноўванне знешніх дысбалансаў і стабілізацыю сітуацыі на ўнутраным валютным рынку», - сказана ў апублікаваным у чацвер аналітычным аглядзе асноўных тэндэнцый у грашова-крэдытнай сферы, які рэгулярна рыхтуе НББ, паведамляе «Інтэрфакс Захад».

У справаздачы сказана, што праведзеная 24 мая разавая дэвальвацыя нацвалюты на 56% была прадпрынятая «з мэтай выхаду на адзіны раўнаважны курс беларускага рубля на ўсіх сегментах ўнутранага валютнага рынку». Новае цэнтральнае значэнне рублёвага кошту кошыка замежнай валюты склала Br1810. Межы дапушчальных ваганняў захаваныя на ўзроўні плюс/мінус 12% адносна ўсталяванага цэнтральнага значэння.

Па дадзеных НББ, на 25 жніўня кошт кошыка валют склаў Br1857, 18, што на 2,6% больш адносна цэнтральнага значэння. У параўнанні з 31 снежня 2010 года, афіцыйны курс беларускага рубля дэвальваваны на 76,09% у адносінах да кошыка валют.

У справаздачы таксама падкрэсліваецца зніжэнне чыстага набыцця замежнай валюты ўдзельнікамі рынку. Так, па дадзеных НББ, у чэрвені чысты попыт на ўсіх сегментах валютнага рынку знізіўся да $265,4 млн з $956,6 млн у студзені гэтага года.

Пры гэтым у НББ нагадваюць аб уведзеных адміністрацыйных абмежаваннях на валютным рынку, накіраваных на зніжэнне попыту з боку суб'ектаў гаспадарання. Так, з сакавіка сума набыцця імпартнага абсталявання за кошт набыцця замежнай валюты не можа перавышаць эквівалент 50 тыс. еўра, з красавіка уведзены размеркавальны парадак замежнай валюты на біржы - у адпаведнасці з прыярытэтамі: імпарт медыкаментаў, газу і пагашэнне валютных крэдытаў. У выніку за студзень-чэрвень чысты попыт юрыдычных асоб на замежную валюту зніжаны да $660 млн з $2767 млн у студзені-чэрвені 2010 года. Зніжэнне чыстага попыту прадпрыемстваў на замежную валюту склала $2,17 млрд, або 76,8%. У чэрвені 2011 года чыстае набыццё валюты прадпрыемствамі склала $123,3 млн супраць $268,9 млн у чэрвені 2010 года.

На рынку наяўнай замежнай валюты, па дадзеных НББ, у першым паўгоддзі захаваўся павышаны попыт насельніцтва на замежную валюту. Так, за студзень-чэрвень 2011 г насельніцтва купіла $2869,5 млн (на 1,9% больш, чым у студзені-чэрвені 2010 года), прадало - $2497,4 млн (на 18,2% менш). У выніку чыстае набыццё насельніцтвам замежнай валюты склала $372,1 млн супраць чыстага продажу $235,5 млн у аналагічным перыядзе 2010 года.

Між тым, фактычная адсутнасць свабоднага продажу замежнай валюты ў пунктах абмену валют з красавіка гэтага года дазваляе Нацбанку канстатаваць яе чыстую продаж насельніцтвам на $70.7 млн у чэрвені, супраць чыстага набыццяна $560,3 млн у сакавіку гэтага года.