Пагадненне аб малым прымежавым руху з Літвой і Латвіяй ўступіць у сілу пасля 1 ліпеня

Пасля першага ліпеня пагадненне аб прымежавым руху з Літвой і Латвіяй можа ўступіць у сілу.

Пра гэта заявіў на прэс-канферэнцыі ў сераду ў Менску старшыня дзяржаўнага памежнага камітэта Ігар Рачкоўскі, перадае "Інтэрфакс Захад".

"Тое, што я ведаю ў межах сваёй кампетэнцыі: з Літвой і Латвіяй гэтыя дзеянні ідуць актыўна. У Польшчы гэтае пытанне, у сілу розных абставінаў, прытармажваецца", - адзначыў ён.

І. Рачкоўскі адзначыў, што гэтыя пагадненні запатрабуюць дадатковых выдаткаў на абсталяванне дадатковых памежпераходаў. "Нягледзячы на ​​цяжкія часы, урад пойдзе на набыццё новых сродкаў памежнага кантролю ў межах малога памежнага руху", - падкрэсліў старшыня ДПК.

Кантроль магчымых парушэнняў знаходжання на прымежавых тэрыторыях, па ягоных словах, будуць ажыццяўляць сумесныя пасты ДПК і супрацоўнікаў органаў унутраных справаў. Акрамя таго, будзе ажыццяўляцца выбарачны кантроль і весціся прафілактычная праца з грамадзянамі ў межах прымежавага руху. "Ні адзін нармальны чалавек не захоча паехаць за межы тэрыторыі, таму што ён будзе пазбаўлены гэтага права назаўсёды", - перакананы І. Рачкоўскі.

Ён таксама ўдакладніў, што пры прыняцці гэтага рашэння памежнікі вывучылі малы прымежавы рух Украіны і Польшчы. "300 парушальнікаў на год з 300 тысяч чалавек. І, як правіла, прычына - няведанне тэрыторыі", - адзначыў ён.

Як паведамлялася, пагадненне аб прымежавым руху прадугледжвае спрошчаны парадак перасячэння межаў Беларусі жыхарамі прымежавых тэрыторый краіны і суседніх дзяржаваў (Латвія, Літва і Польшча), якія стала пражываюць там не менш трох гадоў. Акрамя таго, пагадненне прадугледжвае магчымасць знаходжання гэтых катэгорый грамадзян на прымежавых тэрыторыях да 90 дзён на працягу паловы года. Да прымежавых тэрыторый адносяцца прылеглыя да мяжы адміністрацыйна-тэрытарыяльныя адзінкі, якія ўваходзяць у зону да 50 км ад лініі мяжы.