МВФ: Беларусі патрэбна яшчэ 11 міліярдаў даляраў крэдыту

Міжнародны валютны фонд адзначае, што для падтрымання беларускай эканомікі ўладам неабходны буйныя запазычванні.

МВФ ацэньвае запатрабаванне Беларусі ў фінансаванні на суму $11 млрд: у 2009 годзе $6,8 млрд і $4,2 млрд у 2010 годзе. Такія разлікі экспертаў МВФ прыведзены ў апублікаваным у сераду ў першым аглядзе (па выніках I квартала 2009 года) рэалізацыі праграмы stand-by у Беларусі, паведамляе «Інтэрфакс».

Па ацэнцы экспертаў МВФ, крыніцы фінансавання, якія мае Беларусь, дазваляюць кампенсаваць запатрабаванне ў фінансаванні на $3,845 млрд. Такім чынам, дэфіцыт фінансавання на гэты год складае $2,971 млрд, які мяркуецца пакрыць за кошт сродкаў МВФ (па праграме stand- by) на $2,771 млрд і крэдыту Міжнароднага банка на мэты развіцця ў памеры $0,2 млрд. У выніку, па ацэнцы МВФ, у 2009 годзе Беларусь цалкам «закрывае» запатрабаванні ў фінансаванні.

Пры гэтым не пакрыты крыніцамі дэфіцыт фінансавання на 2010 год складае, па іх ацэнцы, каля $820 млн. Гэтая сума – уяўляе сабой розніцу паміж агульным дэфіцытам фінансавання ў 2010 годзе на ўзроўні $1,5 млрд і рэшту сродкаў МВФ у памеры $657 млн, якія плануецца выдаць у наступным годзе. Наяўныя крыніцы фінансавання Беларусі на 2010 год МВФ ацэньвае ў $2,754 млрд.

Асноўны аб'ём запатрабавання Беларусі ў фінансаванні прыходзіцца на дэфіцыт рахунку бягучых аперацый ($3,9 млрд у 2009 годзе і $3 млрд у 2010 годзе) і пагашэнне кароткатэрміновых крэдытаў ($1,7 млрд і $0,8 млрд). Асноўнымі крыніцамі фінансавання з'яўляюцца чыстыя прамыя замежныя інвестыцыі ($1,5 млрд у 2009 годзе і $2,3 млрд у 2010 годзе) і сярэдне-доўгатэрміновыя крэдыты ($2,5 млрд і $1,8 млрд).

Запатрабаванне ў фінансаванні таксама ўключае ў сябе вызначанае праграмай павелічэнне золатавалютных рэзерваў Беларусі ў 2009 годзе на $2,143 млрд да $5,2 млрд (1,9 месяца імпарту), у 2010 годзе - на $2,88 млрд да $8,1 млрд (2,3 месяцы імпарту).

Як раней паведамляў сайт www.charter97.org, 25 жніўня на сустрэчы з прэм'ер-міністрам Сяргеем Сідорскім дырэктар Еўрапейскага дэпартамента МВФ Марак Белька выказаў занепакоенасць станам золатавалютных рэзерваў Беларусі.

Марак Белька адзначыў, што ў кароткатэрміновай перспектыве заклапочанасць выклікае менавіта «праблема нізкага ўзроўня замежных рэзерваў» Беларусі, «якая можа ўяўляць пагрозу для стабільнасці краіны».

Як стала вядома, беларускія ўлады ўжо звярнуліся за чарговым крэдытам МВФ.