Улетку беларусаў можа чакаць дэвальвацыя і 3-дзённы працоўны тыдзень

Эксперты асцерагаюцца банкаўскага крызісу і праблем з пагашэннем знешняй запазычанасці.

«У нас яшчэ застаецца пытанне, ці атрымае Беларусь 2 млрд. даляраў расейскага крэдыту. На рынках іншых краін наша прадукцыя мае не такую ўжо вялікую ўдзельную вагу», -- перадае «Заўтра тваёй краіны» словы прафесара Аляксандра Лучанка.

Пры гэтым Аляксандр Лучанок падкрэсліў, што, на ягоны погляд, з'яўляецца важнай адмова ад прагнозных валавых паказчыкаў вытворчасці. Важней засяродзіцца на памяншэнні адмоўнага сальда гандлёвага балансу, для чаго «неабходная поўная рэструктурызацыя эканомікі».

Дарэчы, пытанне аб адмене давядзення валавых паказчыкаў да прадпрыемстваў у цяперашні час абмяркоўваецца беларускім урадам. Праўда, чыноўнікі падкрэсліваюць, што да практычнага рашэння яшчэ далёка.

«Карысць для эканомікі ад прагнозных валавых паказчыкаў толькі ў тым, што іх лёгка параўноўваць з падобным паказчыкам іншых краін, кантраляваць прырост і гэтак далей», -- кажа Аляксандр Лучанок.

Аляксандр Лучанок лічыць, што ў эканоміцы Беларусі сёлета чакаюцца рэформы, прычым «праходзіць яны будуць зверху, а не знізу». Паміж тым правядзенне рэформаў, падкрэслівае старшыня ГА «Менскі сталічны саюз прадпрымальнікаў і працадаўцаў» Уладзімір Карагин, гэта адзін з самых спрыяльных сцэнараў развіцця падзей.

«Нават пры частковых рэформах будуць уведзеныя механізмы мабілізацыйнай эканомікі, як у ваенны час, што ўласціва нашай сістэме. Гэты засвоены метад дазволіць запампаваць тавараправодную сетку, даць каманду структурам МЗСа на прасоўванне тавараў. Пры гэтым замежным партнёрам могуць абяцаць розныя прывілеі на беларускім рынку. Працу зарыентуюць на пэўныя краіны – Венесуэлу і некаторыя арабскія дзяржавы».

Уладзімір Карагин лічыць, што, хутчэй за ўсё, да лета з'явіцца нарматыў, які будзе прадугледжваць скарочаны працоўны тыдзень з 3-4 дзён.

«Людзі ў нас працавітыя, паедуць на агароды. І два мільёны дачных участкаў усё жа ўносяць свой уклад у харчовы кошык».

Па неспрыяльным сцэнары, па меркаванні Ўладзіміра Карагина, падзеі будуць развівацца ў выпадку, калі Беларусь не атрымае расейскі крэдыт, не будзе нічога зроблена па разняволенні асабістай эканамічнай ініцыятывы малога і сярэдняга бізнэсу. Сваю ролю згуляе нават тое, ці збяруць сёлета такі жа добры ўраджай, як у мінулым.

«У гэтым выпадку трэба чакаць змен на рынку працы. Нездарма рыхтуюцца змены ў нарматыўнай базе, у прыватнасці з нагоды азначэння новых крытэраў масавага вызвалення працаўнікоў. Масавае беспрацоўе вызначаецца як для буйных прадпрыемстваў, так і для структур малога бізнэсу. Пры неспрыяльным сцэнары можна чакаць пэўных сацыяльных абвастрэнняў, звязаных з праблемамі з выплатай пенсій і розных дапамог» -- заяўляе эксперт.

Аналітыкі адзначаюць, што сярэднегадовы курс даляра ў 2009 годзе будзе складаць меркавана–– 3300-3500 рублёў. Таксама ўлетку ўлады могуць правесці яшчэ адну дэвальвацыю беларускага рубля. Хутчэй за ўсё, як адзначаюць эксперты, паніжэнне курсу рубля будзе праходзіць улетку, у разгар дачнага сезону.