Жан-Луі Ларан: Працэс над Аўтуховічам павінен транслявацца па тэлебачанні
4- 3.12.2009, 12:35
Кіраўнік генеральнага дырэктарата Рады Еўропы па дэмакратыі і пытаннях палітыкі ўпэўнены, што судовы працэс над Мікалаем Аўтуховічам павінен быць адкрытым.
30 лістапада – 2 снежня ў Менску з афіцыйным візітам знаходзіўся кіраўнік генеральнага дырэктарата Рады Еўропы па дэмакратыі і пытаннях палітыкі Жан-Луі Ларан. Еўрапейскі чыноўнік заявіў, што працэс над ваўкавыскімі прадпрымальнікамі Мікалаем Аўтуховічам і Уладзімірам Асіпенкам, якія абвінавачваюцца ў падрыхтоўцы тэракту, павінен ісці ў прамым эфіры па тэлебачанні, паведамляе «Радыё Рацыя».
«Адным з пытанняў, якія абмяркоўваліся, была сітуацыя з арыштам і будучыным судовым працэсам над Аўтуховічам. Плануецца правесці адкрыты судовы працэс над ваўкавыскімі прадпрымальнікамі. Было выказана меркаванне, што працэс павінен транслявацца ў прамым эфіры беларускім тэлебачаннем, таму што прапагандысцкім кіно мы ўжо насыціліся. Тым больш, што цяпер дзяржаўнае тэлебачанне пазбаўленае ад неабходнасці плаціць падаткі і можа дазволіць сабе такую трансляцыю», - распавёў аглядальнік Раман Якаўлеўскі пасля сустрэчы з Жан-Луі Ларанам.
Таксама падчас свайго візіту ў Беларусь Жан-Луі Ларан заявіў, што беларускія ўлады абавязаныя адмяніць смяротнае пакаранне: справа не столькі ў адмене смяротнага пакарання, колькі ў агульным прыняцці патрабаванняў Рады Еўропы.
Рада Еўропы рэкамендавала Беларусі ў якасці ўмовы для аднаўлення статусу спецзапрошанага ў ПАРЕ адмяніць смяротнае пакаранне ці, у скрайнім выпадку, увесці мараторый.
«Справа нават не столькі ў адмене смяротнага пакарання ці абвяшчэнні мараторыя на яго, колькі ў агульным прыняцці патрабаванняў Рады Еўропы, якія прад'яўляюцца ўсім краінам, што жадаюць стаць чальцом арганізацыі», — адзначыў еўрапейскі чыноўнік.
«Замена смяротнага пакарання на пажыццёвае зняволенне — гэта больш страшнае пакаранне для таго, хто здзейсніў злачынства», — перакананы Жан-Луі Ларан.
Як раней паведамляў сайт charter97.org, ваўкавыскія прадпрымальнікі Мікалай Аўтуховіч, Юры Лявонаў і Уладзімір Асіпенка былі затрыманыя 8 лютага 2009 года. 18 лютага ім было прад'яўленае абвінавачванне па арт. 218 КК. 23 чэрвеня ў дачыненні да Аўтуховіча і, як паведаміла МУС, «іншых асобаў» была ўзбуджаная справа па арт. 359 КК (тэрарыстычны акт) у выглядзе падрыхтоўкі (арт. 13).
8 жніўня Лявонава вызвалілі з менскага следчага ізалятара, а 24 верасня з яго былі знятыя ўсе абвінавачванні.
З 16 красавіка па 16 ліпеня палітвязень Аўтуховіч праводзіў галадоўку, патрабуючы ў найкарацейшыя тэрміны альбо перадаць справу ў суд, альбо змяніць усім падследным меру стрымання з утрымання пад вартай на падпіску аб невыяздзе.
Праваабаронцы лічаць затрыманых палітычнымі вязнямі, звяртаючы ўвагу на тое, што Аўтуховіч і Лявонаў раней ужо былі асуджаныя і прызнаныя міжнароднай супольнасцю вязнямі сумлення.
Судовы працэс па крымінальнай справе палітвязня Мікалая Аўтуховіча пройдзе ў Вярхоўным судзе.
