Лукашэнка: «Разлічвайце на горшае. Я пайду на чацвёрты тэрмін»

Аляксандр Лукашэнка заявіў пра намер пайсці на чацвёрты прэзідэнцкі тэрмін. "Калі сітуацыя будзе такая, як цяпер, і са мной асабіста, і ў краіне, то, вядома, я буду балатавацца на чарговы тэрмін. Калі сітуацыя са мной або з краінай зменіцца, то рашэнне можа быць іншым. Але гэта магчыма. Разлічвайце на горшае", -- заявіў беларускі правіцель у інтэрв'ю агенцтву "Рэйтэр".

"Рэйтэр" прыводзіць выцемкі з інтэрв'ю Аляксандра Лукашэнкі, дадзенага ім агенцтву ўчора.

Пра парламенцкія "выбары" і апазіцыю

"Выбары ў Беларусі мы праводзім для беларусаў. Гэтае наша ўнутраная справа".

"Выбары мы будзем праводзіць так, як гэта трэба нашаму народу. Нашы выбары заўсёды былі больш дэмакратычнымі, чым у іншых дзяржаў - нашых суседзяў, у тым ліку ў краінах ЕЗ, і вы ўсё роўна выказвалі нам прэтэнзіі".

"Мы іх правядзем не горш, чым у краінах ЕЗ. Як ацэніце іх вы, гэта залежыць ад вашага сумлення і вашай арыентацыі. Я патрабую сёння ад усіх структур правесці выбары так, каб вам было сорамна кінуць у нас камень і сказаць, што выбары не адпавядалі тым стандартам, што ў Еўропе".

"Калі ў "парламенце" будзе некалькі апазіцыянераў, ад гэтага наш "парламент" не сапсуецца. Іх усё роўна будзе меншасць".

"Але я баюся, падкрэсліваю, баюся, што яны, ізноў жа, не патрапяць у парламент".

"Хто заслужыць, той у парламент і патрапіць. Мая задача - забяспечыць нармалёвы працэс галасавання".

"Калі сітуацыя будзе такая, як цяпер, і са мной асабіста, і ў краіне, то, вядома, я буду балатавацца на чарговы тэрмін. Калі сітуацыя са мной або з краінай зменіцца, то рашэнне можа быць іншым. Пакуль я здаровы чалавек, народ не так ужо моцна мяне крытыкуе і Захад пачынае разумець. Гэта магчыма. Разлічвайце на горшае".

Пра знешнюю палітыку

"Калі амерыканцы жадаюць мець тут 20, 30 або 50 дыпламатаў - напрамілы Бог. Але дыпламаты, якія працуюць не на карысць, а ў шкоду адносінам, - гэта нонсэнс".

"Калі з намі размаўляць з пазіцыі сілы, нам такія дыпламаты не патрэбны. Жадаюць бачыць у нас незалежную суверэнную дзяржаву - мы і душу і краіну для іх адчыняем".

"Амерыканцы краіну не перавернуць. У нас не так шмат амерыканскага капіталу. Палохаць нас санкцыямі не трэба. Мы выжывем".

"ЗША дамагаецца, каб ЕЗ увёў санкцыі супраць Беларусі. Гэта будзе Еўропе ў шкоду. На агульнае шчасце, ЕЗ пакуль не заняў амерыканскую пазіцыю. Еўрапейцы слушна папракаюць ЗША, што тыя пачалі курс санкцыяў, не параіўшыся з ЕЗ".

"Калі вам гэта трэба - далучайцеся, але не забывайце, што праз Беларусь ідзе палова нафты, палова нафтапрадуктаў і 30 адсоткаў газу".

"Калі Еўропе не патрэбна Беларусь, яна будзе патрэбна камусьці іншаму. Давайце будаваць нармалёвыя адносіны. Калі вы гатовыя, давайце пачынаць з заўтрашняга дня".

"Тое, што вы ад нас адгароджваецеся, гэта - ваша справа. Мы вам забараняць уезд не будзем".

"Вы СССР крытыкавалі за жалезную заслону. А чым вы займаецеся цяпер? Чым мы вас напалохалі, што вы мне і іншым людзям забараняеце ўезд у свае краіны? Пытанне трэба ставіць (так): "Што вы, ЕЗ, зробіце, каб нармалізаваць адносіны з Беларуссю?"

"Мы знаходзімся паміж двума важнымі блокамі, такімі не падобнымі адзін на аднаго. Мы - своеасаблівы мост, і нам трэба гэтыя супрацьлегласці злучыць".

"Захад спрабуе калі не разбурыць гэты мост, то, прынамсі, яго расхістаць. Не магу зразумець, навошта вам гэта трэба".

"Укараняць у нас нейкую дэмакратыю, якой няма ў вас саміх, - гэта, прынамсі, абсурдна".

"Сёння, у такой вострай сітуацыі, калі энерганосьбіты вызначаюць усё, вы спрабуеце разбурыць мост, па якім цячэ нафтавы і газавы струмень".

Пра палітвязняў

"Па-першае я лічу, што гэта сапраўды не іх справа. Хай разбяруцца спачатку са сваімі зняволенымі. Са зняволенымі ў Гуантанама, Аўганістане і гэтак далей. З іншага боку, нам не хацелася б, каб з-за шасці чалавек цярпела ўся краіна. Мной, асабіста мной было прынята рашэнне - вызваліць. Пяцёра пагадзіліся, шосты адмовіўся. Нядаўна ён заявіў, што чым больш ён будзе сядзець у турме, тым вышэй будзе яго рэйтынг".

"Гэта яго выбар (відаць, Лукашэнка мае на ўвазе Аляксандра Казуліна - заўв. Хартыі'97). Я ж яго за вушы не буду цягнуць адтуль. У нас на сёння няма палітычных зняволеных".

Пра эканоміку

"Мы амаль у два разы перасягнулі ўзровень савецкіх часоў у вобласці эканомікі. Мы, у асноўным, мадэрнізавалі нашу эканоміку, што датычыць буйных і сярэдніх прадпрыемстваў. Мы больш паловы працы зрабілі па мадэрнізацыі нашай сельскай гаспадаркі ў цэлым".

"Што да інфляцыі, то дзякуй Захаду і даляру, што яны нам у гэтым "дапамагаюць". Гэта інфляцыя ад вас да нас. Сёлета яна крыху вышэй, але яна не страшная і не крытычная для нашай эканомікі".

"У адрозненне ад нашых суседзяў, мы не адчынілі краіну, не адчынілі браму і не сказалі "прыходзіце, хто хоча, бярыце, што хочаце, і ўкладайце грошы", не зважаючы на тое, якія гэта грошы. Мы так краіну не адчыняем. Мы рабілі стаўку на развіццё ўласнай вытворчасці".

"Калі гэты праект нам патрэбны, мы можам пайсці і на стоадсоткавую прыватызацыю і кантрольны праект аддаць інвестару, пры ўмове, што гэта сумленны інвестар".

"Мы не ў той сітуацыі, калі нам трэба кідацца на любы праект. Сёння мы можам выбіраць".

"Мадэль можа быць абсалютна рознай. Але гэта будзе пунктавая прыватызацыя. Агулам мы нічога не робім".