Ярмошынай не спадабаўся выніковы даклад БДІПЧ АБСЕ па «парламенцкіх выбарах»

Старшыня беларускага Цэнтравыбаркаму назвала даклад еўрапейскіх назіральнікаў «крокам назад».

"Цэнтральная камісія прааналізавала заключны даклад БДІПЧ АБСЕ па парламенцкіх выбарах. Лічу, што ён з'яўляецца крокам назад у параўнанні з папярэдняй справаздачай", — заявіла ў інтэрв'ю БелаПАН старшыня ЦВК Беларусі Лідзія Ярмошына.

"Тым не менш, — падкрэсліла яна, — мы, мусіць, упершыню не напісалі заўвагаў наконт прэтэнзіяў і пажаданняў, якія выказала АБСЕ. Гэта не значыць, што мы іх не маем. Аднак лічым контрпрадуктыўным шлях, калі бакі знаходзяцца ў перапісцы, а не абмяркоўваюць гэта ўсё за сталом і не знаходзяць агульнага кампрамісу".

Л.Ярмошына адзначыла, што візіт у Менск прадстаўнікоў БДІПЧ АБСЕ, які адбудзецца ў канцы студзеня, будзе мець "істотнае значэнне для нашых далейшых узаемаадносінаў з еўрапейскімі партнёрамі".

Паводле словаў старшыні Цэнтравыбаркаму, самі прадстаўнікі БДІПЧ АБСЕ будуць вызначаць, якія пытанні яны хацелі б абмеркаваць. "Кожны орган, які яны абяруць, будзе абмяркоўваць з імі пытанні па сваім накірунку. Я не ведаю, з кім яны пажадаюць сустрэцца. Тое, што з прадстаўнікамі Цэнтральнай камісіі, — гэта бясспрэчна. У асноўным будуць абмяркоўвацца пытанні выбараў, якія прайшлі, іх канчатковая ацэнка з боку АБСЕ, а таксама перспектывы магчымага рэфармавання выбарчага заканадаўства", — сказала яна.

Л.Ярмошына таксама паведаміла, што на пачатак лютага запланаванае "дастаткова вялікае абмеркаванне выніковага дакладу БДІПЧ АБСЕ з арганізатарамі выбараў на месцах". "Мы ўжо накіравалі ў рэгіёны копію дакладу, каб старшыні выбарчых камісіяў, прадстаўнікі арганізацыйных упраўленняў аблвыканкамаў падрыхтаваліся да падобнага абмеркавання", — адзначыла яна.

Нагадаем, у выніковым дакладзе БДІПЧ кажацца, што нягледзячы на "некаторыя паляпшэнні", "выбары" у Беларусі не адпавядалі стандартам АБСЕ. У прыватнасці, выбарчае заканадаўства не дае магчымасці для "сапраўднай палітычнай канкурэнцыі і роўнага стаўлення да кандыдатаў з боку ўладаў" і "перашкаджае правядзенню выбараў" у адпаведнасці з дэмакратычнымі стандартамі. Эксперты адзначаюць, што Выбарчы кодэкс Беларусі "не забяспечвае празрыстага механізму захаванасці скрыняў з бюлетэнямі пасля пачатку датэрміновага галасавання, а таксама механізму абароны самога бюлетэня". Большасці апазіцыйных кандыдатаў было адмоўлена ў рэгістрацыі "з-за нязначных парушэнняў фармальных патрабаванняў", падкрэсліваецца ў дакладзе. На думку экспертаў місіі, усё гэта "стварае магчымасці для фальсіфікацыяў".