Лукашэнка: Амерыканская амбасада дае грошы на экстрэмісцкія мэты

У інтэрв'ю кіраўнікам афіцыйных СМІ Аляксандр Лукашэнка спрабаваў казаць аб лібералізацыі, але ўсё роўна скатваўся да звыклых пагроз і абраз.

Пры гэтым абраза ЗША не перашкодзіла яму папрасіць у Амерыкі 5 мільярдаў даляраў крэдыту.

Абвінавачванні ў адрас амбасады ЗША у Беларусі

У інтэрв'ю вядучым беларускім СМІ 18 снежня Аляксандр Лукашэнка заявіў, што лічыць правільнымі дзеянні беларускага боку ў дыпламатычным канфлікце са Злучанымі Штатамі, аднак імкнецца нармалізаваць адносіны з гэтай краінай і звяртаўся да яе за крэдытам.

«Што датычыцца цяперашняга дэмаршу ў сувязі з амбасадай ЗША. Ну скажыце, што тут не так? Вы ўводзіце супраць нас санкцыі неабгрунтаваныя. Амбасада тут арганізоўвае дэманстрацыі. Амбасадар практычна бывае на кожнай з іх. Праз амбасаду ідуць грошы не тое што апазіцыі. Добра ўжо апазіцыі — на экстрэмісцкія нейкія мэты выкарыстоўваюць. Я ж не ідыёт. Я ж ведаю, куды і як ідуць гэтыя грошы, няхай не ў поўным аб'ёме, але мне дастаткова тэндэнцыі. Пытанне: навошта нам такая амбасада? Амбасада ў краіне знаходжання заўсёды існуе для таго, каб збліжаць народы, паляпшаць адносіны, а ў нас усё наадварот. Таму было прынятае рашэнне: калі вы так дзейнічаеце і пачалі на нас ціснуць эканамічна, арыштоўваць рахункі нашых прадпрыемстваў у Амерыцы, — да пабачэння», — сказаў А.Лукашэнка.

Але, тым не менш, абраза ЗША не перашкодзіла Лукашэнку звярнуцца да ЗША з просьбай аб крэдыце ў 5 мільярдаў даляраў.

«Мы таксама ідзем насустрач, — адзначыў беларускі кіраўнік. — Нам складана — мы і да амерыканцаў звяртаемся за дапамогай. Праўда, не вельмі і спяшаюцца нам дапамагчы, а дарма. Але я звяртаўся і да іх за дапамогай, хоць яны вельмі доўга разглядалі. Таму што пяць мільярдаў даляраў для іх гэта не праблема. Але адносіны значна мы маглі бы палепшыць. У гэтых трыльёнах пяць мільярдаў. Прытым гэта жа не бясплатна, мы жа вернем гэтыя грошы, пад адсоткі прасілі і ў амерыканцаў у тым ліку. Але трэба аддаць належнае, што амерыканцы ў МВФ з гэтымі перамовамі нас падтрымалі. Еўрапейцы, амерыканцы падтрымалі, і я за гэта ім вельмі ўдзячны. Гэта сапраўды кажа аб тым, што ёсць разуменне і з таго боку нашага імкнення нармалізаваць адносіны з велізарнай імперыяй, якая з'яўляецца галоўным фактарам развіцця сусветных адносінаў. Мы гэта вітаем, мы ў гэтым напрамку і будзем дзейнічаць. Дай бог, каб новая адміністрацыя гэта разумела».

Аб апазіцыі

«Мы ж для народа дзяржаву ствараем. Якая ж гэта для народа дзяржава? Ізноў жа да нядаўняга прыкладу звяртаюся. Дайшлі да таго, што пракурора прыйшлося арыштоўваць. Таму, я думаю, вы разумееце, пра што ідзе гаворка ў частцы лібералізацыі нашай эканомікі і нават не эканомікі.

Лібералізацыі ўсяго жыцця нашага грамадства. Гэта датычыцца ўсіх, і адносіны з апазіцыйнымі СМІ, з апазіцыяй і гэтак далей. Гэта не таму, што на нас там, ведаеце, Захад націснуў, таму Лукашэнка выклікаў Макея і Янчэўскага і кажа: бягіце туды, няхай там нейкія газеты прыходзяць, друкуюцца тут і гэтак далей. Ну добра, друкуйце, паглядзім, хто іх будзе купляць. Прадаваць-та мы за іх не будзем. Няхай паспрабуюць. І калі мы маем нейкія кантакты з асобнымі апазіцыянерамі і гэтак далей, гэта не значыць, што вось як учора Лукашэнка іх у Парламент павінен быў пасадзіць, каб яны там сядзелі і рабілі. Гэтага не будзе. Мы хочам гэта зрабіць сапраўды. Вось на падставе гэтага прынцыпу, калі ласка, мы будзем рабіць усё, будзем размаўляць з кім заўгодна».

Адказ прадпрымальнікам

«Ну куды гэта прыдатна, вось прадпрымальнікі (я, праўда, не вельмі-та паглыбіўся ў гэты працэс, гэта, мусіць жа, не першы раз) пачынаюць тут шумець, крычаць. Рабяты, чаго крычаць, калі ўжо на тое пайшло? Чаго крычаць? Мы адступілі летась у гэты час на год. Таму што прадпрымальнікі прасілі: год дайце нам, мы тут разбярэмся. Прайшоў год. Разабраліся? Не. Так чаго крычаць? Хоць бы сумленне мелі. Усіх трэба ставіць у роўныя ўмовы і праўдзіва весці бізнэс. Таму я накіраваны на тое, каб і з прадпрымальнікамі, з апазіцыяй, у цэлым з грамадствам, але асабліва з тымі людзьмі, якія прыносяць багацце краіне і хочуць працаваць, мы паводзілі сябе цывілізавана. Гэта галоўны мой сённяшні клопат. Больш скажу, прызначаючы Кіраўніка Адміністрацыі, я зыходзіў перш за ўсё з гэтага. Ведаючы чалавека, я яму сказаў, вось твая галоўная задача — дэбюракратызацыя. Стаў на вушы любога. Не спраўляешся, прыходзь да мяне, будзем гэтым займацца. Трэба даць чалавеку волю».

Аб сабатажы чыноўнікаў і спробах перавароту

«Што датычыцца «агонь па штабах» і запалохвання чынавенства, давайце скажам адкрыта, гэта жа функцыя прэзідэнта. Як ён ужо гэта будзе рабіць — тонка, выдасканалена або сапраўды і напрамую, гэта ўжо залежыць ад самога прэзідэнта. Як вы бачыце, я ніколі нічога не хаваў. І гэта нельга назваць «агнём па штабах». Калі такі штаб не падыходзіць, вядома, ён патрапіць пад агонь або крытыкі, або знішчальны агонь — суцэльны. Але гэта функцыя прэзідэнта, ён гэтыя штабы кантраляваць абавязаны або адкрываць агонь, або падвяргаць крытыцы, або літаваць. Калі ў выніку гэтага паўстануць нейкія групкі, якія, знаходзячыся ў органах улады, будуць праводзіць іншую палітыку, чым палітыку, якую праводзіць абраны прэзідэнт, а я бо праводжу палітыку ў адпаведнасці з тым, што я і казаў на перадвыбарных сходах, у перыяд выбараў. Я жа не ішоў да людзей і не казаў: слухайце, я вас тут адбыму ўсіх, накармлю, сагрэю, вы будзеце што хочаце рабіць, вы, чыноўнікі, будзеце прыватызацыяй займацца, красці, красці. Я жа гэтага не казаў, я казаў, што агонь будзе па штабах на знішчэнне, калі вы будзеце так рабіць. Абралі — выконвайце. Не выконваеце, тады можа быць і агонь... Хоць я не бачу такога штаба, які бы я «разбамбаваў» у цэлым. Але калі не будзе гэта выконвацца, у будучым годзе мы гэта зробім.

Кланы? У Беларусі кланавасць немагчымая. У нас у прынцыпе кланаў не можа быць. Але «групкі», «груповачкі» па інтэрасах, скажам так, яны могуць быць, яны могуць шыпець неяк, што вось, маўляў, правільна, не правільна. Ну калі гэты крытычны такі настрой, я ведаю, ён існуе ў шматлікіх, ну і добра. Ну чаго жа яны павінныя ухвалям-с, разумеем-с і гэтак далей?

Шыпець — гэта адно, і абмяркоўваць на кухнях, напрамілы Бог. Гэта заўсёды было, гэта ў любой дзяржаве. А вось калі гэта перарастае ў сабатаж, ды яшчэ ў дзяржаўным апараце нейкая групоўка... Тады будзе адкрывацца «агонь на паражэнне» у нейкім напрамку. Вось сабатажу ў дзяржаўных структурах Прэзідэнт не можа дапусціць. Таму што гэта прадвеснік хаосу. Гэта прадвеснік дэстабілізацыі».

Пра Еўропу і санкцыі

Аляксандр Лукашэнка заявіў, што будзе годна весці дыялог з Еўропай, без асаблівага імкнення знайсці спосаб палепшыць гэтыя адносіны.

"Калі хтосьці думае, што я захапіў прынаду і буду скачкападобна, як заяц бегчы, ён памыляецца, мы будзем трымацца годна", - сказаў беларускі кіраўнік журналістам.

Такім чынам А.Лукашэнка пракаментаваў факт паўгадавога мараторыя для беларускіх чыноўнікаў на забарону ўезду ў ЕЗ.

Ён заўважыў, што гэты мараторый скончваецца ў красавіку і на яго "пачынаюць ціснуць, хутчэй ламаючы заканадаўства".

Аб пагрозе амерыканскіх СРА у Чэхіі і Польшчы

Размяшчэнне амерыканскіх элементаў сістэмы СРА у Чэхіі і Польшчы пагражае бяспецы Беларусі, заявіў А.Лукашэнка.

"Мы дакладна заявілі ЗША па СРА, якія яны хочуць размясціць у Чэхіі і ў Польшчы, што гэта пагражае нашай бяспецы", - сказаў ён.

"Таму што гэта каля нашых меж і таму, што гэта супраць нашага саюзніка РФ", - растлумачыў беларускі кіраўнік.

Па меркаванні А.Лукашэнкі, "гэтыя ракеты могуць быць не проста для таго, каб знішчаць ракеты іншых дзяржаў, але і наносіць удары па аб'ектах, у тым ліку, ядзернай зброяй".