У Нямеччыне бяздомны беларус паказаў экстрэмальнае шоў

Патрапіў пад цягнік, саскочыў з даху і паспрабаваў уцячы ад паліцыі.

Раніцай у нядзелю 40-гадовы грамадзянін Беларусі арганізаваў шоў на вакзале горада Фульда ў зямлі Гесэн у Нямеччыне. Але скончылася яно для яго не вельмі добра, паведаміла нямецкая паліцыя.

Для пачатку мужчына пераскочыў праз некалькі чыгуначных шляхоў, на шостым з іх яго зачапіў цягнік. Калі цягнік спыніўся, мужчына пралез пад ім і працягнуў шлях. Ён перайшоў чыгунку да канца, пералез праз агароджу вышынёй 1,6 метра, падышоў да краю будынка і саскочыў уніз з вышыні 6 метраў.

Дзякуючы дзеянням паліцыянтаў, мужчына не стукнуўся галавой аб зямлю пры скачку, але атрымаў бачныя траўмы рук і галовы. Аднак, ён паспрабаваў уцячы, але яго затрымалі і даставілі ў шпіталь.

Як паведамляе паліцыя, беларус з'яўляецца валацугам. На яго распачалі справу аб адміністрацыйным правапарушэнні.