Тадэвуш Кандрусевіч: Мы павінны шанаваць сваю гісторыю і традыцыі
- 3.12.2023, 17:26
- 4,368
![Тадэвуш Кандрусевіч: Мы павінны шанаваць сваю гісторыю і традыцыі](https://i.c97.org/p/articles/ai-154477-aux-head-tadeush_kandrusievich_360.jpg)
Пра што згадаў арцыбіскуп у звароце з нагоды Адвэнту.
Арцыбіску-эмэрыт Тадэвуш Кандрусевіч, Старшыня Камісіі агульнага душпастырства пры Канфэрэнцыі Каталіцкіх Біскупаў у Беларусі, зьвярнуўся да вернікаў з нагоды пачатку Адвэнту, паведамляе «Радыё Свабода».
Адвэнтам называецца перадкалядны пэрыяд сярож хрысьціян каталіцкай царквы і некаторых пратэстанцкіх цэркваў, аналягічны пэрыяду Каляднага посту на Ўсходзе. Для вернікаў гэта пэрыяд духоўнай падрыхтоўкі да Калядаў, час роздумаў і добрых справаў.
«Адвэнт — гэта час падрыхтоўкі нашых сэрцаў да прыйсьця Пана: адзінага Справядлівага Судзьдзі, які аддае чалавеку паводле яго заслугаў. Гэта вельмі важна ў наш час, калі людзі так моцна прагнуць павагі, справядлівасьці і сумленнасьці, бо на жыцьцёвым небасхіле ня бачаць пазытыўных знакаў». — піша Тадэвуш Кандрусевіч.
Арцыбіскуп дадае, што хрысьціянства перажывае нялёгкі час і сутыкаецца зь велізарнымі праблемамі. Ён перакананы, што вера слабне і нават зьнікае, а Эўропа ўжо больш не зьяўляецца хрысьціянскай, а постхрысьціянскай.
«У першую чаргу з тым, што дамінуючая ў сьвеце лібэральна-сэкулярная культура насьцярожана, а часам нават і варожа, ставіцца да веры. Трэба прызнаць, што таксама нашыя, не заўсёды добрыя, прыклады хрысьціянскага жыцьця адштурхоўваюць многіх людзей ад Касьцёла. — працягвае герарх. — Як кожны з нас, так і ўвесь Касьцёл, мы маем патрэбу ў аднаўленьні і ачышчэньні».
Кандрусевіч заклікаў выкарыстаць час Адвэнту як часу малітвы і разважаньняў, каб духоўна аднавіцца.
«Мы таксама павінны шанаваць сваю гісторыю і традыцыі і чэрпаць сілу і натхненьне з таго, што нам пакінулі продкі. Але адначасова мы не павінны баяцца вырабляць новыя мяхі, каб у іх несьці новае віно Добрай Навіны тым, хто яго прагне». — піша ў звароце да вернікаў арцыбіскуп Тадэвуш Кандрусевіч.