У Белгарадзе завыла сірэна і прагрымелі выбухі

Насельніцтва ахапіла паніка.

У ноч на 29 сакавіка ў Белгарадзе і Белгародскім раёне Расейскай Федэрацыі была абвешчаная паветраная трывога. Аб гэтым напісаў губернатар Белгародскай вобласці Вячаслаў Гладкоў у сваім Telegram-канале.

Кіраўнік рэгіёну папярэдзіў аб ракетнай небяспецы і заклікаў мясцовых жыхароў не падыходзіць да вокнаў, схавацца ў памяшканні без вокнаў з суцэльнымі сценамі або спусціцца ў сховішча.

Пазней Гладкоў дадаў, што над Белгарадам і Белгародскім раёнам спрацавала сістэма СПА, нібыта знішчыўшы 15 паветраных цэляў на падлёце да горада. Паводле яго слоў, абышлося без пацярпелых, аднак у Белгарадзе выбіты вокны ў 37 кватэрах 17 шматкватэрных дамоў.

Губернатар сцвярджае, што аскепкі таксама пашкодзілі балкон адной кватэры, шкленне ў «Белгарад Арэне» і гімназіі, а таксама 12 аўтамабіляў.

Акрамя таго, Гладкоў заявіў, што ў пасёлку Дубовае Белгародскага раёна ў адным прыватным домаўладанні пасечаны дах, а ў сяле Рэпнае аскепкамі пашкоджаны адзін аўтамабіль.

Расейскае медыя "Асцярожна, навіны" піша, што ў выніку абстрэлу ў Белгарадзе быў пашкоджаны шматкватэрны дом на бульвары Юнацтва. Журналісты паведамляюць са спасылкай на мясцовых жыхароў, што над вобласцю былі чутныя "гучныя гукі". Паводле інфармацыі інтэрнэт-выдання, ёсць "прылёты" на вуліцы Ясеніна.

Мясцовыя Telegram-каналы пішуць, што з-за "прылётаў" нібыта ёсць разбурэнні на вуліцы Губкіна і на тэрыторыі мікрараёна Харкаўская гара ў Белгарадзе. У сетцы таксама з'явіліся адпаведныя фота і відэа.

У Мінабароны Расеі пакуль ніяк не пракаментавалі тое, што адбылося.