Яек у Расеі стала яшчэ менш

Нягледзячы на абяцанні Крамля.

У Расеі працягвае скарачацца вытворчасць курыных яек, нягледзячы на абяцанні Пуціна палепшыць сітуацыю.

Па выніках студзеня—лютага 2024 года ў краіне было выпушчана на 1,8% менш за гэтую прадукцыю, чым год таму. У натуральным вылічэнні птушкафабрыкі вырабілі 6,11 млрд штук, або на 11,01 млн яек менш, чым за той жа перыяд мінулага года.

Толькі за люты вытворчасць курыных яек скарацілася год да года на 1,5%, а месяц да месяца - на 7,5%, да 29,3 млрд штук. Пры гэтым месячны аб'ём выпуску застаецца ніжэйшы за леташні з верасня 2023 года, а сам прадукт увайшоў у лік найбольш падаражэлых на харчовым рынку.

Са звестак Расстата, сярэднія спажывецкія кошты яек са студзеня да снежня 2023 года выраслі ў 1,6 разы, да 132,45 рас. руб. за дзесяць штук. У лютым гэтага года дзясятак каштаваў у сярэднім 129,17 руб.

Пуцін у снежні назваў сітуацыю з коштамі яйк "збоем у працы ўрада" і растлумачыў дынаміку ростам попыту ва ўмовах абмежавання прапановы. “Сітуацыя, без усялякага сумневу, будзе паляпшацца. Я вельмі на гэта спадзяюся”, - адзначыў Пуцін.

Каб стабілізаваць кошты, урад увёў бяспошлінныя квоты на імпарт 1,2 млрд яек у 2024 годзе. Мінсельгас паведаміў, што птушкафабрыкі збіраюцца павялічыць вытворчасць прадукту.

Зніжэнне вытворчасці курыных яек звязана з успышкамі грыпу птушак, кажа прэзідэнт Agrifood Strategies Альберт Даўлееў. Не ўсе птушкафабрыкі, дзе ў 2023-м былі выяўлены ўспышкі хваробы, аднавілі вытворчасць, зазначае кіраўнік Нацыянальнай мясной асацыяцыі Сяргей Юшын. Ён дадаў, што працэс аднаўлення можа заняць ад некалькіх месяцаў да паўтара года.

Са звестак Расптушкасаюза, на 1 сакавіка 2024 года на ўсіх сельгаспрадпрыемствах краіны было 465,3 млн галоў птушкі, што на 1,2% менш, чым годам раней.

Скарачэнне прапановы курыных яек прыкметнае, але пакуль не адбіваецца на коштах, кажа крыніца "Коммерсанта" сярод рэтэйлераў. Многія буйныя вытворцы ўклалі пагадненні аб стрымліванні адпускных коштаў, а вытворцы прадуктаў харчавання маглі часткова пераключыцца на імпартныя яечныя прадукты, растлумачыў субяседнік. Паводле ягоных слоў, баланс попыту і прапановы на рынку будзе бачны пасля сезону высокага попыту на Вялікдзень.