«У Тэрэспалі занятыя ўсе стаянкі: перагоншчыкі рэзервуюць гатэлі і чакаюць, што будзе далей»

Польшча забараніла вываз у Беларусь некаторых аўто.

З 23 сакавіка Польшча ўвяла забарону на вываз у Беларусь аўтамабіляў з аб'ёмам рухавіка 1,9 літра і больш. Гэтае абмежаванне таксама закранае машыны коштам больш за 50 тысяч еўраў.

Пра гэта паведамляюць у памежных чатах, а таксама ўдзельнікі аўтарынку, якія займаюцца перавозкай машын з ЕЗ.

Аб уведзеных абмежаваннях таксама паведамляе bolshoi_autoblog.

- Польшча не дае экспартныя дэкларацыі. Польшча не прапускае машыны з нямецкімі ды іншымі дэкларацыямі. Усе аўто на транзітных нумарах разварочваюць. У Тэрэспалі занятыя ўсе стаянкі, перагоншчыкі рэзервуюць гатэлі і чакаюць, што будзе далей», - адзначае bolshoi_autoblog і дадае, што гэтыя абмежаванні, паводле неправеранай інфармацыі, могуць дзейнічаць да 1 красавіка.

Мытны камітэт Беларусі 25 сакавіка выпусціў прэс-рэліз, у якім паведаміў аб інфармацыі наконт абмежаванняў, уведзеных польскім бокам пры перасячэнні мяжы. Аднак там падкрэслілі, што гэтая інфармацыя з неафіцыйных крыніц і інтэрнет-рэсурсаў. Афіцыйнай інфармацыі ад польскага боку ведамства не дало.