Першая беларуская крыптабіржа працуе ў загадкавым рэжыме

Сакрэтная крыптабіржа абяцае зарабіць у «хуткім часе».

Першая беларуская крыптабіржа «Карэнсі Ком Бел» за тры месяцы сваёй працы ў рэжыме закрытага бэта-тэставання набрала 140 тысяч заявак ад патэнцыяльных карыстачоў, паведамілі Office Life ў кампаніі.

Як растлумачылі ў «Карэнсі Ком Бел», наяўнасць чаргі тлумачыцца патрабаваннямі заканадаўства для праверкі дакументаў і ідэнтыфікацыі карыстальнікаў.

На практыцы карэспандэнт паспрабаваў атрымаць доступ да біржавых таргоў. Ніякіх ідэнтыфікацыйных звестак у яго запытана не было. У адказ робат «Карэнсі Ком Бел» выслаў электронны ліст, які апавяшчае, што заяўка на рэгістрацыю прынятая і што ў чарзе знаходзяцца больш за 12 тысяч чалавек. І што пазней будзе высланае спецыяльнае запрашэнне. Таксама было прапанавана падзяліцца спасылкай на сайт біржы з сябрамі ў сацыяльных сетках, каб атрымаць больш ранні доступ да прылад біржы.

У кампаніі сцвярджаюць, што кожны дзень высылаюць сотні запрашэнняў на доступ да сістэмы кліентам з ліста чакання.

На запыт аб пачатку працы біржы ў кампаніі адказалі, што плануюць выйсці ў адкрыты рэліз «найбліжэйшым часам», і тады ўсе ахвотныя пасля праходжання працэдуры рэгістрацыі змогуць стаць кліентамі кампаніі.

Таксама патэнцыйным кліентам, акрамя праверкі асобы і ідэнтыфікацыі інтэрнэт-адрасоў уваходу на платформу, будзе прапанавана адказаць на пытанні для вызначэння ўзроўню кампетэнцыі ў сферы краптавалют і фінансаў. Карэспандэнт папрасіў выслаць гэтыя пытанні для тэставання, аднак кампанія ад гэтага ўстрымалася.

Мяркуючы з таго, што інфраструктурным партнёрам «Каэнсі Ком Бел» выступае ангельская/кіпрская кампанія «Капитал.ком», якая спецыялізуецца на рызыкоўных фінансавых спекуляцыях, тэставыя пытанні беларускай крыптабіржы могуць абапірацца на матрыцу менавіта гэтай фірмы. Іх пытанні датычацца ў асноўным спецыфічных фінансавых тэрмінаў, звязаных з біржавымі таргамі, індэксамі, форэкс-рынкам і г.д. Але часам трапляюцца забаўныя, напрыклад, складальнікі тэставых заданняў просяць вызначыць узровень ліквіднасці розных фінансавых інструментаў, называючы ў якасці адной з «падказак» квіткі на канцэрт вядомага амерыканскага рэпера.

У «Карэнсі Ком Бел» паведамілі, што для вялікіх транзакцый яны запытваюць пацвярджэнне крыніцы сродкаў. Таксама правяраюць чысціню грошай, якія выводзяцца на крыптабіржу. «Мы таксама правяраем інфармацыю, прадстаўленую службамі супрацьдзеяння легалізацыі даходаў, атрыманых злачынным шляхам (AML), і ідэнтыфікацыі кліентаў (KYC)», - адказалі на наш запыт у кампаніі.

Фактычна, гэта азначае, што «Карэнсі Ком Бел» стала першай прыватнай беларускай кампаніяй, якая атрымала доступ да закрытых баз звестак сілавых структур і судовай сістэмы. Нагадаем, нацыянальным каардынатарам у сферы прытрымлівання стандартам Групы распрацоўкі фінансавых захадаў барацьбы з адмываннем грошай (ФАТФ) выступае Камітэт дзяржкантролю.

Карэспандэнт таксама пацікавіўся, чаму служба падтрымкі «Карэнсі Ком Бел» размешчаная на Кіпры. Адпаведны нумар з кіпрскім тэлефонным кодам і ўдакладненнем кіпрскага гадзіннага пояса размешчаны на сайце крыптабіржы. Адказвае на тэлефонныя званкі аўтаадказчык, які прапануе пакінуць свае кантакты для зваротнай сувязі. Аднак у афіцыйным адказе кампанія запэўніла, што іх служба падтрымкі знаходзіцца ў менскім офісе.