Пяць скандалаў вакол клінінгавай кампаніі, якой зацікавіўся СК

На кампанію даўно скардзіліся ў Беларусі і не толькі.

У Беларусі затрымалі дырэктара вядомай кампаніі «Чысты свет плюс» паводле абвінавачвання ў дачы хабару. Структура з'яўляецца часткай групы кампаній Facilicom, створанай выхадцамі Беларусі.

UDF.BY распавядае, у якія яшчэ скандалы яна трапляла ў Расеі, Украіне ды нашай краіне.

Скандал з нелегаламі ў Расеі

У 1994 годзе Эдуард і Алена Апсіт стварылі ў Менску клінінгавую кампанію, пазнаёміўшыся з досведам такога бізнэсу ў Нідэрландах. Праз некалькі гадоў яны прыехалі развіваць бізнэс у Маскву, і з часам іх група кампаній Facilicom вырасла да вялікіх памераў. Сярод іх бізнэсу ёсць нават «Народны даверны банк».

Фірма пад назвай «Чысты свет» стала адным з найбуйнейшых клінінгавых аператараў. Сярод яе кліентаў было, напрыклад, Міністэрства абароны Расеі.

Праўда, Эдуард Апсіт скардзіўся, што вялікіх грошай пры супрацоўніцтве з вайскоўцамі зарабіць не ўдавалася: «Вельмі дрэнная сітуацыя: з гэтым дзяржаўным кантрактам немагчыма прыпыніць працу, пры гэтым дзяржаўныя заказчыкі застаюцца вінныя выканаўцам за гады працы, некаторыя з іх не атрымлівалі аплату больш за год».

У 2014 годзе ўспыхнуў скандал вакол расейскага «Чыстага свету», маскоўскія праваахоўнікі затрымалі на некаторы час кіраўнікоў фірмы. Структуру абвінавацілі ў выкарыстанні нелегальнай працы мігрантаў з Сярэдняй Азіі і нявыплаце падаткаў. Пры гэтым паведамлялася, што заснавальнікі – жонка і мужык Апсіт - Расею пакінулі.

Некаторыя рэсурсы сцвярджалі, што яны ўцяклі ва Украіну і крымінальная справа іх не закранула.

Абвінавачванні ва Украіне

Ва Украіне ў фірмы «Чысты Свет Фасіліком» таксама знайшліся апаненты. Кампанію абвінавачвалі ва ўдзеле ў дамоўных тэндарах і штучным заніжэнні коштаў. Нібыта фірма магла загадзя згаварыцца з заказчыкам аб тым, што рэальны аб'ём работ напраўду будзе меншы за афіцыйна заяўлены.

Зрэшты, гэтыя абвінавачванні цалкам маглі быць выкліканыя незадаволенасцю канкурэнтаў з ліку старых кампаній.

Крах з абслугоўваннем жылых дамоў

У 2016 годзе пры рэформе ЖКГ прыватныя структуры афіцыйна атрымалі права займацца прыборкай пад'ездаў. «Чысты свет плюс» адразу ж здабыў буйныя тэндары на абслугоўванне дамоў у некалькіх раёнах Менска.

Але жыхары сталі масава скардзіцца на якасць работ, выкладваючы фатаграфіі ў сеціва.

Дагаворы на ўборку пад'ездаў з «Чыстым светам плюс» сталі скасоўваць.

На тэндарах кампанія прапаноўвала кошты ніжэйшыя за нарматыўныя, але высветлілася, што справіцца з задачай ёй часам не па сілах.

Крытыка за якасць персаналу і стаўленне да яго

Кампанія «Чысты свет плюс» набірала прыбіральшчыц, прапаноўваючы ім заробкі ад 200-220 рублёў. Натуральна, людзі былі моцна незадаволеныя такім стаўленнем, абвінавачваючы кіраўнікоў у жаданні нажывы.

З іншага боку, кліенты і жыхары дамоў пісалі на форумах, што сярод прыбіральшчыкаў шмат маргінальных элементаў.