Расейскі рубель аднавіў падзенне напярэдадні пасяджэння ФРС ЗША

Курс расейскага рубля набліжаецца да лагічнага фіналу.

Палёт рубля на Маскоўскай біржы, які доўжыўся два тыдні, набліжаецца да лагічнага фіналу, піша finanz.ru.

На таргах у сераду рубель таннее другі дзень запар на фоне сыходу з рынку экспарцёраў, якія прадавалі валюту пад падатковы перыяд, і скупкі даляраў нерэзідэнтамі, якія па-ранейшаму бягуць з расейскай дзяржаўнай пазыкі.

Пасля падзення на 4 рублі з 10 верасня курс даляра падняўся на 17 капеек у аўторак і яшчэ на 16 капеек да 16.24 паводле беларускага часу серады, зноў прабіўшы адзнаку 66 рублёў. Еўра дадаў 18 капеек за 2 дні, дасягаючы ў моманце 77,59 рубля.

«Патэнцыял для далейшага ўмацавання рубля паступова вычэрпваецца», - кажа аналітык Nordea Дзяніс Давыдаў: хоць нафта б'е 4-гадовыя рэкорды і таргуецца вышэй за 80 даляраў за барэль Brent, на курс ціснуць пасяджэнні Федэральнай рэзервовай сістэмы ЗША, якая ў сераду абвесціць аб далейшым узмацненні жорсткасці грашовай палітыкі.

Імавернасць чарговага павышэння ключавой стаўкі да 2-2,25% гадавых рынак ацэньвае амаль на 100%. Адначасова ФРС павялічыць аб'ём аперацый у скарачэнні балансу і з кастрычніка пачне адбіраць па 60 млрд даляраў на месяц.

Гэтыя падзеі ўжо закладзеныя ў каціроўкі, але рынак баіцца, што стануць больш жорсткімі прагнозы ФРС на будучыню, паказваюць аналітыкі Societe Generale: у чэрвені члены Федэральнага рэзерву галасавалі за павышэнне стаўкі ў верасні і снежні, два павышэнні ў 2019-м годзе і адно - у 2020-м.

У сераду ФРС упершыню раскрые праекціроўкі на 2021-ы год і з вялікай імавернасцю дадасць яшчэ адзін крок праз тры гады, адзначыўшы сілу эканомікі ЗША, якая расце з рэкорднай за 4 гады хуткасцю.

Па меры таго, як даляравыя стаўкі растуць, рубель губляе прывабнасць для замежных інвестараў, якія ўклалі 20 млрд даляраў у аперацыі carry-trade ў 2016-17 гадоў.

У найгоршым выпадку можа пачацца новая хваля продажаў аблігацый федэральнай пазыкі, кажа начальнік управы гандлёвых аперацый на расейскім фондавым рынку «Фрыдам Фінанс» Георгій Вашчанка: «Яна выкліча новае абясцэненне рубля, які да канца месяца будзе таргавацца ў інтэрвале 65-70 за даляр, нягледзячы на рост кошту нафты».

За жнівень замежныя інвестары вывелі з АФЗ яшчэ 98 млрд рублёў, паведаміў Банк Расеі ў сераду. За верасень продажы склалі яшчэ 114 рублёў, а доля нерэзідэнтаў на рынку апусцілася да 25%, распавяла напярэдадні дырэктар дэпартамента фінансавай стабільнасці ЦБ Лізавета Данілава.

Рубель падтрымлівалі экспарцёры, прадавалі валютны прыбытак, але падатковы перыяд заканчваецца, а з ім - падае попыт на рублі, пішуць аналітыкі «Ашчадбанка CIB».

Нерэзідэнты тым часам прадаўжаюць скупляць валюту. «Адток капіталу застаецца высокім, што не дазваляе рублю ўмацавацца істотна ніжэй 66 за даляр», - адзначаюць аналітыкі Банка «Санкт-Пецярбург».