Жыхары Бараўлянаў змагаюцца з уладамі за лес

У Бараўлянах пад школу сякуць лес, хоць побач ёсць пустое поле.

Мясцовыя жыхары сабралі 6 500 подпісаў супраць забудовы. І гэта далёка не першая спроба данесці да ўладаў свой пункт гледжання на будучыню інфраструктуры свайго раёна, паведамляе «Белсат».

Жыхары Бараўлянаў абмеркавалі з мясцовымі ўладамі справаздачу аб ацэнцы ўздзеяння на навакольнае асяроддзе аб'екта «Дзіцячы сад - сярэдняя школа», які павінен узнікнуць на месцы ляснога масіву.

«Перад пасяджэннем мы вывучылі справаздачу АУНА, і, на жаль, пра нейкую ўсебаковую, аб'ектыўнасць гэтага дакумента не даводзіцца казаць. Усе аднабока, і, відавочна, галоўнае было давесці, што секчы трэба, іншых месцаў для пабудовы няма», - кажа жыхарка Марыя Вайтовіч.

Аднак месца ёсць, адзначаюць мясцовыя: гэта велізарнае поле побач. Згодна з карэктаваннем генеральнага плана, на гэтым месцы таксама запраектаваныя два дзіцячыя садкі і адная школа, а таксама шматкватэрнае жыллё. Атрымліваецца, што значная частка сацыяльных аб'ектаў будзе сканцэнтраваная практычна ў адным месцы, і гэта даволі далёка ад існых масіваў шматкватэрнай забудовы.

«Калі мне было 10 гадоў, я прыязджала сюды ў ягады і грыбы. І хадзіла па лесе. Тут было толькі некалькі трохпавярховых старых дамоў на вуліцы 40 гадоў Перамогі. Больш нічога - астатняе быў лес. Людзі высеклі лес, паставілі дамы, а што цяпер ўперліся ў гэты пералесак?», - кажа мясцовая жыхарка Таццяна.

Улады ж сцвярджаюць, што «робяць усё магчымае», каб пашыраць інфраструктуру раёна, аднак фактычна ў тым жа мікрараёне Зялёны Бор мясцовым жыхарам да сёння не стае дадатковай школы і садка, да якіх можна дабрацца пешшу.

«Калі мы яшчэ засяляліся ў 2008-2009 годзе, казалі, што з часам будзе прыбудова да школы, якая дазволіць нашым дзецям вучыцца побач з домам. Але неяк усё заціхла, а воз і цяпер там, - заўважаюць жыхары Зялёнага Бора. - На аўто ехаць, потым у школу адвозіць і забіраць. Потым у музычную везці. Ну, маці хіба што працаваць не трэба, каб займацца адукацыяй дзяцей і займацца развозам па садах, школах».

Каб давесці немэтазгоднасць высякання лесу, мясцовыя жыхары замовілі паралельна з дзяржаўнай ацэнкай уздзеяння на навакольнае асяроддзе будучага аб'екта ацэнку навукоўцаў з Нацыянальнай акадэміі навук.

«У справаздачы аб АУНА згадваецца толькі адзін чырвонакніжны від, які там знайшлі. А навукоўцы Акадэміі навук на пасяджэнні сцвярджалі, што там ёсць як мінімум другі від чырванакніжных раслін і, магчыма, там таксама ёсць чырвонакніжныя кузуркі. А тры чырвонакніжныя віды - гэта фактычна нагода, каб абвясціць гэтую тэрыторыю мясцовым заказнікам», - кажа Рыгор Фёдараў з грамадскага аб'яднання «Экадом».

У кожным выпадку часу на дапрацоўку і карэктаванне генеральнага плана яшчэ трохі ёсць - грамадскія абмеркаванні наконт гэтага пытання будуць доўжыцца да 25-га верасня.