Беларускі музыка атрымаў у Польшчы дзяржпадтрымку і адчыніў сваю школу

«Чакаў некалькі месяцаў».

У беларускага гітарыста Паўла Трыпуця, удзельніка калектываў Volski і OpTeamist project, у Варшаве свая школа-студыя, дзе ўжо некалькі гадоў навучаюць ігры на гітары, а з нядаўняга часу яшчэ і вакалу.

Каб рэалізаваць праект, беларус атрымаў ад польскай дзяржавы бязвыплатную фінансавую падтрымку на развіццё бізнэсу. Як у яго гэта атрымалася і на якіх умовах вылучаецца дапамога, Павал расказаў MOST.

У 2020 годзе Павал пераехаў з Беларусі ў Польшчу, а пазней перавёз з сабой і сям'ю. У польскай сталіцы беларускі музыка пачаў выкладаць у сусветна вядомай сетцы музычных школ Yamaha – навучаў дзяцей ігры на гітары. З часам ён пачаў даваць і прыватныя ўрокі. У адрозненне ад школы, дзе ў яго былі выключна польскія вучні (Павал добра валодае польскай), прыватныя заняткі наведвалі ў асноўным беларускія дзеці.

Індывідуальныя заняткі былі значна больш выгаднай справай, і неўзабаве ў музыкі з'явілася ідэя адкрыць у Варшаве ўласную школу-студыю. Аднак яе стварэнне ўпіралася ў мноства цяжкасцяў, у першую чаргу фінансавых. У Паўла ставала сродкаў на арэнду, але вось абсталяванне каштавала прыстойных грошай, і трэба было падумаць, дзе іх знайсці.

Адмаўляюць часта, але надумаў паспрабаваць

Павел пастанавіў паспрабаваць узяць грошы ад польскай дзяржавы паводле праграмы «Фінансавая падтрымка прадпрымальніцкай дзейнасці» (Wsparcie finansowe dla działalności gospodarczej), якая распрацаваная для прадпрымальнікаў-пачаткоўцаў. Грашовую дапамогу ў гэтай праграме могуць атрымаць не толькі грамадзяне краіны, але і іншаземцы, у якіх ёсць сталы ВНЖ (карта сталага побыту) і адкрытае ІП.

Павал ведаў, што часта адмаўляюць заяўнікам, але надумаў рызыкнуць.

– Мая жонка і адна мая знаёмая дапамаглі напісаць спецыяльны праект, ці па-іншаму бізнэс-план, дзе я падрабязна распісаў, што з сябе будзе ўяўляць мая школа, а таксама ўказаў, які канкрэтна памер дапамогі спатрэбіцца і на што менавіта. Бізнэс-план я падаваў у бюро працы (urząd pracy), туды ж трэба было падаць яшчэ і цэлы стос дакументаў. Нейкія дакументы потым давялося даносіць. На ўсе гэтыя працэдуры і на чаканне адказу ў мяне спатрэбілася некалькі месяцаў. Аднак гэта таго каштавала. У выніку я атрымаў пастанову, што фінансаванне будзе вылучанае, – расказвае Павел.

«Будуць звяраць усё паводле пунктаў, каб ты набыў толькі тое, што прасіў»

У выніку беларускі музыка атрымаў аднаразовую выплату памерам некалькі тысячаў еўраў, якой даволі на набыццё неабходнага абсталявання. Павал змог набыць ноўтбук, пульт, гітару, комбаўзмацняльнік, калонкі і нават сёе-тое з мэблі.

Вылучаюцца грошы бязвыплатна. Але трэба выканаць некаторыя ўмовы. Па-першае, неабходна цягам наступнага года плаціць падаткі ў польскі бюджэт. Паводле словаў Паўла, тым самым трэба «прадэманстраваць, што ты добрапрыстойны прадпрымальнік, які сапраўды будзе будаваць бізнэс у гэтай краіне». Цягам года ІП зачыняць нельга. Па-другое, калі сродкаў будзе выдаткавана менш, чым было вылучана, рэшту неабходна вярнуць.

– Зразумела, што ў крамах кошты могуць мяняцца – дзесьці зніжка з'явілася, а дзесьці, наадварот, нешта падаражэла. Але памер пры набыцці не павінна адрознівацца ад заяўленага ў праекце больш як на 10%. Б/у-абсталяванне таксама браць нельга, набываць трэба толькі ў крамах і пасля кожнага набытку прасіць фактуру (дакумент, які выпісваецца прадаўцом і пацвярджае продаж тавараў і паслуг. – Заўвага). Потым раздрукоўваеш усе гэтыя фактуры і ідзеш з імі даваць справаздачу ў urząd pracy. Там будуць звяраць усё паводле пунктаў і правяраць, каб ты набыў толькі тое, што прасіў, і каб усё гэта каштавала прыкладна столькі ж, колькі ты напісаў у сваім бізнэс-плане. А калі ў цябе пасля ўсіх набыткаў застаецца, напрыклад, 500 злотых, то ты павінен будзеш іх абавязкова вярнуць.

У выніку Павал здолеў адчыніць школу ігры на гітары, якая стала прыносіць прыбытак, а пазней з'явіліся магчымасці пашырыць бізнэс. Спачатку ў студыі з'явіўся яшчэ адзін педагог, які выкладае ігру на гітары два разы на тыдзень і навучае малодшую групу. А зусім нядаўна Павал арандаваў другое памяшканне, дзе будзе праходзіць навучанне вакалу. На гэты раз нятаннае абсталяванне Павал змог набыць за ўласныя сродкі.

Бясплатныя заняткі для дзяцей палітвязняў

Навучае спевам у новай студыі вядомая беларуская харавая дырыжорка Юлія Марчанка (Юніцкая). Яна вядомая як бэк-вакалістка некаторых праектаў гурта Irdorath.

– Я назваў бы Юлію разыначкай сваёй школы. І тыя, хто пачынае хадзіць да яе на заняткі, часта застаюцца ў вялікім захапленні. Пра яе вельмі добрыя водгукі. У яе ўнікальная методыка спеваў, пастаноўкі голасу і дыхання. Так што вэлкам. Усіх чакаем! – кажа Павал.

У студыях Паўла цяпер навучаецца некалькі дзясяткаў дарослых і дзяцей. Прыкладна палова з іх палякі, астатнія – беларусы і ўкраінцы.

Паспяховае развіццё музычнай школы з часам дазволіла Паўлу не толькі зарабляць на любімай справе, але і арганізаваць дабрачынныя заняткі. Такія ўрокі праводзяцца для дзяцей беларускіх палітычных вязняў.

– Ігры на гітары ў мяне навучаецца адна дзяўчынка, чые бацькі знаходзяцца ў турме ў Беларусі паводле палітычных прычынаў. Што да вакалу, то там мы робім бясплатныя групавыя заняткі для дзяцей палітвязняў. У нас ужо ёсць першая такая група, у якой займаюцца сем дзетак.

Паводле словаў Паўла, некаторыя вучні ягонай школы ўжо цешаць поспехамі. Напрыклад, адзін хлопец з Беларусі, які навучаўся ў Паўла блізу года ігры на гітары, стаў удзельнікам некалькіх міжнародных конкурсаў і плануе паступаць у музычную вышэйшую навучальную ўстанову ў Нямеччыне.