Даля Грыбаўскайтэ: Дзякуй Ватыкану за падтрымку ў барацьбе з СССР

Прэзідэнт Літвы падзякавала Папу Рымскаму.

Папа Рымскі Францішак прыбыў у Літву з дзяржаўным візітам і правёў сустрэчу з прэзідэнтам краіны Даляй Грыбаўскайтэ. Прэзідэнт Літвы падзякавала кіраўніку каталіцкай царквы за тую падтрымку, якую Святы прастол надаў антысавецкаму супраціву ў Прыбалтыцы, паведамляе прэс-служба Грыбаўскайтэ і РБК.

«Прэзідэнт падзякавала Папу Рымскаму за ўвагу Літве - нашай гісторыі і барацьбе за свабоду. Асабліва важна, што Святы прастол, які ніколі не прызнаваў акупацыю нашай дзяржавы і захаваў дыпламатычнае прадстаўніцтва Літвы, паслядоўна падтрымліваў наш антысавецкі супраціў», - гаворыцца ў паведамленні прэс-службы прэзідэнта Літвы.

Грыбаўскайтэ адзначыла важнае значэнне, якое каталіцкая царква мае для жыхароў Літвы. «Для нашай краіны важная моцная Царква і цвёрдае яе слова. Літва падтрымлівае правядзенне рэформаў і намаганні Святога айца наблізіць Царкву да людзей. Ва ўсёй краіне людзі з вялікай надзеяй чакаюць, якім пасланнем падзеліцца Папа Рымскі і з якім заклікам ён павернецца да моладзі», - паведамляе прэс-служба словы прэзідэнта Літвы.

Таксама Грыбаўскайтэ і Папа Рымскі закранулі палітычныя пытанні: як сцвярджаецца, у паведамленні гаворка ішла аб пытаннях бяспекі краін Балтыі, а таксама аб праблематыцы постсавецкай прасторы. Прэзідэнт Літвы заявіла аб падтрымцы «ўкраінскага і грузінскага народаў». «Літва, якая жыве побач з агрэсіяй і хлуснёй (Расея), добра разумее і спачувае тым, хто вядзе барацьбу за свабоду і незалежнасць», - патлумачыла Грыбаўскайтэ.

Падчас сустрэчы кіраўнікі Літвы і Ватыкана абмяняліся падарункамі. Грыбаўскайтэ падарыла Папу Рымскаму сімвал незалежнасці Літвы - Звон Свабоды, і аўдыёзапіс творы «Gloria Літве». У адказ Францішак паднёс прэзідэнту Літвы рэпрадукцыю мазаікі IX стагоддзя, якой упрыгожаны Сабор Святога Пятра ў Рыме, чатыры напісаныя ім кнігі і медаль Папы Рымскага.

У рэлігійным плане сярод насельніцтва Літвы пераважаюць каталікі. Сярод літоўцаў блізу 80% вызнаюць каталіцтва. У перыяд знаходжання ў складзе Савецкага Саюза каталіцкія святары зазнавалі рэпрэсіі, большая частка рэлігійных арганізацый была ліквідаваная.

Як адзначае прэс-служба прэзідэнта Літвы, для Грыбаўскайтэ візіт Францішка ў Вільню стаў ужо шостай сустрэчай з Папам Рымскім. Раней яна сама чатыры разы наносіла візіт у Ватыкан. Кіраўнік каталіцкай царквы, у сваю чаргу, раней наведваў Літву толькі адзін раз - у 1993 годзе, калі пасля аднаўлення незалежнасці краіны ў Літву прыбыў Ян Павел II.