Чатыры прыклады супярэчлівых паводзін Лукашэнкі ў Аршанскім раёне

Дыктатар забывае, што ён рабіў і казаў зусім нядаўна?

Лукашэнка паводзіць сябе як мінімум дзіўна. Пра гэта піша «Салідарнасць», якая сабрала чатыры прыклады непаслядоўных паводзін правадыра ў Аршанскім раёне:

1. Даў загад захаваць старыя вытворчыя плошчы. І знішчыць іх.

Наведваючы прадпрыемства «Тэхніка сувязі» ў Барані, Лукашэнка абрынуўся з крытыкай на службоўцаў, якія мелі намер пазбавіцца ад лішніх пустых вытворчых карпусоў (у тым ліку, шляхам продажу).

Відэа дазваляе ўбачыць, як тры кіраўнікі паслядоўна спрабуюць растлумачыць правадыру дзяржавы, што з савецкіх часоў памяшканняў засталося і так занадта шмат (цэхі знаходзяцца на тэрыторыі 25 гектараў, 40% не выкарыстоўваецца), але той толькі яшчэ больш раздражняецца.

Самае цікавае, што пры наведванні Аршанскага мясакансервавага камбіната правадыр заняў іншую пазіцыю. Пабываўшы ў некалькіх цэхах, ён раскрытыкаваў тое, як утрымліваюцца памяшканні і матэрыяльна-тэхнічная база: «да 7 лістапада 2020 года тут гэтага быць не павінна. Трэба выдаць сродкі, арганізаваць новы забойны цэх, усё гэта зруйнаваць (старыя будынкі) і зрабіць сучаснае прадпрыемства».

2. Абурыўся паказухай. І яе адсутнасцю.

На інструментальным заводзе ў Воршы правадыр выказаў вялікае незадавальненне ашуканствам, якое яму зладзілі, спрабуючы навесці парадак на тэрыторыі прадпрыемства. Ён абурыўся, што асфальт клалі ў траву.

На «Тэхніцы сувязі» ў Барані Лукашэнка вывела з сябе іншае. Ён прайшоў па пустых паверхах, якія адміністрацыяй не выкарыстоўваюцца.

- Вы ператварылі праз паверх гэта памяшканне ў прыбіральню. Два гады пра адно і тое ж кажу - прыехаў: цуды, - абураўся дыктатар.

Пры гэтым, з паведамлення СТВ, на «Тэхніцы сувязі» «выйшлі на рэнтабельнасць і навучыліся зарабляць». Але Лукашэнку, як бачым, больш турбавала іншае.

3. Раскрытыкаваў за ручны рэжым працы. І за тое, што мала ўмешваліся зверху.

На нарадзе ў Воршы правадыр выказаў незадаволенасць тым, што калі нейкія з пастаўленых мэтаў развіцця раёна і дасягаюцца, то толькі ў ручным рэжыме. А трэба знайсці сістэмныя пункты росту, якія дазволяць рэгіёну развівацца без умяшання зверху.

На той жа нарадзе Лукашэнка абурыўся працай міністраў: «Усё трэба было кінуць сюды, каб паказаць, што прэзідэнт у краіне ёсць і ён кіруе краінай, калі ўжо на тое пайшло. А вы заняліся сабатажам».

4. Звольніць кіраўніка раёна, які прапрацаваў усяго год.

Аляксандр Пазняк стаў адной з ахвяр гневу правадыра. Але варта ўспомніць, калі і пры якіх абставінах ён узначаліў Аршанскі райвыканкам.

Увесну 2017 года пад новыя грандыёзныя задачы кіраўніком раёна прызначылі Леаніда Пянькоўскага. Але той прапрацаваў на пасадзе менш за тры месяцы. Прычым ягоны сыход выглядаў ледзь не ўцёкамі з адказнага ўчастка работы: чыноўнік спаслаўся на тое, што стан здароўя не дазволіць яму развязаць пастаўленыя задачы.

У жніўні 2017 года на новую пасаду пагадзіўся памочнік прэзідэнта - інспектар Віцебскай вобласці Аляксандр Пазняк. І вось праз год дыктатар зрабіў яго ахвярным казлом за невыкананне даручэнняў. Можа варта было даць чыноўніку больш часу на тое, каб асвойтацца на новым месцы і паказаць вынік?